عرفته واحببته وزوجته في يوم واحد ج3
بقلم راندا عبد الحميد
وأول ما وصلوا الفيلا… فتح البوابة حارس الأمن…
وقال وليد : عشان تتطمنى أن جبت الحارس ده وفي واحد كمان هيجي بعد يومين… ولو أنا مش موجود محدش هيدخل الفيلا نهائي عندك…
فابتسمت روني وكلامه زود أحساسها بالأمان بالمكان الجديد… وأول ما شافت المرجيحة نزلت من العربية جرى عليها… فقال وليد : بشويش يا حبيبتى عشان النونو…
بس روني قعدت عليها وشدت وليد معاها… وقعدوا يتمرجحوا وهى مبسوطة بيها قوي وفرحانة بيها زي الأطفال بالضبط… وبدأت تتأمل المكان من حواليها لغاية لما شافت واحدة جاية ناحيتهم مبتسمة وقالت : ولكم مستر وليد..ولكم مدام….
فبصت روني لوليد وقالت : ومين دى إن شاء الله ؟…
فابتسم وليد لنبرة الغيرة اللي حسها في كلامها… وده أكبر دليل علي أن حبها ليه لسه موجود… واتمنى من ربنا أنه يقدر يزود الحب ده عشان لما تفتكر كل الحصل تقدر تسامحه… وقال بحب : دى مارية… أنا جبتها هيا وسارة عشان يهتموا بالفيلا والجنينة ويبقوا تحت امرك لما تطلبى حاجة…
فوقفت روني بإعتراض وقالت : لا والله… أنت عارف اصلاً أنا مش بحب موضوع الشغالات وحركاتهم… وأجانب كمان…
وبنظرة واحدة بصت روني لمارية من فوق لتحت وقالت : يا سلام على لبسها؟… مبلاش خالص أحسن طالما حرانة قوي كده… وأنت كنت عايش معاهم هنا وهما كده؟…
وقبل ما يرد وليد قالت روني بحزم : بص بقا قبل ما ادخل الفيلا هما يمشوا… وده قرار ومش هرجع فيه… وأنا هرتب وأعمل كل الشغل لواحدي مش عايزة مساعدة من حد…
فابتسم وليد ومسك كفها السليم وباسه… وقعدها جنبه بهدوء… ولف دراعه على كتفها وقال : يا حبيبة قلبي.. دراعك لسه في الجبس ولسه مخفش…
وشاور علي بطنها وقال : وهنا كمان في نونو لازم ناخد بالنا منه… ومش هينفع تعملى شغل الفيلا كله لوحدك… وأنا اصلاً مش عايزك تتعبى في اى حاجة… عايزك أميرة تامرى وبس… وأنا وهما تحت امرك…
أما موضوع البيات… من وقت ما بعت الشقة بتاعة النادي… وأنا عايش في فندق… ولسه النهاردة الصبح جبت حاجتى قبل التدريب… حتى ما دخلتش جوه… اديتهم الشنطة علي البوابة ومشيت…
ويا قلبي ما تخافيش… أنا عمرى ما ملا عينى غيرك… ولا ممكن يملاها غيرك… وأنا والله ممكن أرضى باى وضع… بس عشانك وعشان النونو خليهم…
فبصت روني لمارية الشغالة بغيظ وقالت : طيب… بس بشرط يلبسوا هدوم واسعة وطويلة وأنا اللي هاختارها ويبقى زى رسمى ليهم… واللي هتغيره فيهم يبقى تتكل على بيتهم… ماشي…
فضحك وليد وقال : طبعا ماشى يا روني… أحنا كلنا هنا تحت امرك…
