عرفته واحببته وزوجته في يوم واحد ج3

فبصلها الدكتور وقال : بتحبى وليد قد إيه ؟
فابتسمت بخجل وبصت الناحية التانية…. وقالت : أكتر من نفسي… أكتر من حياتى كلها… عمري ما حبيت حد قد ما حبيته…
فقال الدكتور : أنا عارف أن قعدتى معاه حوالى شهر وكام يوم بعد
الجواز… قدرتى تحبيه بالشكل ده في المدة دي؟
فاتنهدت وقالت : أنا حبيته الحب ده من قبل ما أعيش معاه.. من أول ما كان في بيت بابا ودخلت اتكلم معاه عشان أقرب منه… وأول مره مسك ايدى حسيت أنى حته منه… حسيت أنى مش هينفع أعيش من غيره… أصلاعمري ما كنت أتوقع أنى احب في يوم من الأيام… بس مجرد ما مسك ايدى حسيت أنه نقل حبه اللي بيحكوا عليه من قلبه لقلبى… وفضل يزيح في الناس الجوايا لغاية لما أخد مكانهم وبقا ساكن جوايا مش هما… أصل وليد لو تعرفه طيب قوي… وحنين عليا… ومش بيحب يزعلني أبدًا…

وبصت لأيدها والجبس بحزن وقالت : بس أيدي مكسورة ليها أيام كتير…
وليد لما يجي مش هيعرف يمسكها ونلعب كورة من تاني مع بعض زى ما عملنا أول مرة بينا…
فقال الدكتور : معلش كام يوم وتخف…
فبصتله ورجعت بصت لبره وقالت بحزن : حتى لو خفت… وليد مش هنا مش بيجي هنا… كان بيجي هناك…
فسأل الدكتور : هناك فين؟
فابتسمت روني : هناك في بيته… هو قال أنه جاب الشقة الحلوة عشاني… عشان أعيش معاه فيها…. وجاب أوضة شبه أوض الأميرات اللي في الحواديت عشاني برضوا… مش قلتلك بيحبني قوي ومش ممكن يزعلني…. بس من وقت ما جيت هنا هو مجاش… كل يوم باستناه بس هو مش بيجي… خايفة يكون نسيني ويسيبني أضيع وأنا مش عارفة أروح فين لوحدي من غيره… أكيد هو بيدور عليا… صح؟ هو أكيد مش عارف مكاني… بس أكيد هيجي في يوم من الأيام… أنا عارفة هو بيحبني وهيجي… وأنا كمان هستناه… أنا عايزة أحكيله حجات كتير… عايزة أقوله وحشتني… عايزة أقوله خبيني… أنا أتوجعت قوي لما بعدت عنك… عشان كده مش همشي من هنا عشان مش عايزة أضيع منه أكتر من كده…

فسألها الدكتور : راندا… أنتي فعلاً من جواكي عايزة تشوفي وليد؟ يعني لو شفتيه مش تخافي منه؟..
فبصت روني لكل ركن في الاوضة بعيون مشتته خايفة وبدأ تنفسها يزيد وقالت بحيرة : وليد بيحبني… مش هيضربني زي الراجل الوحش اللي يشبهه… اللي جه وضربني من غير ما أعمل حاجة… أكيد عايزاه يجي… لا مش عايزاه يجي خلاص أصله بيضرب قوي…
( وحضنت نفسها بخوف وبدأت تتحرك لقدام وورا بخوف)