عرفته واحببته وزوجته في يوم واحد ج3

وأخدها وليد وفرجها على الفيلا… وأول ما دخلوا المطبخ وشمت روني ريحه الأكل حطت ايدها على بقها وجريت على الحمام… ولما طلعت منه كانت دايخة وحاسة هتقع ومش قادرة حتى تفتح عينها… فشالها وليد وطلع بيها علي أوضتهم…
،،،،،،،
لما بدأت روني تسترد صحتها كانت المفاجأة ليها… أن الأوضة زى أوضتهم في مصر… وده فعلاً فرحها…

وليد كان عايز يعمل آي حاجة تحسسها بالأمان في وسط الغربة اللي هما فيها… وبرضوا عشان تاخد على المكان بسرعة وما تخفش… وابتسمت روني وقالت بمشاغبة : على كده الدولاب ماليان هدايا وهدوم برضوا؟… ولا مكنش فيه وقت للدلع ده؟…
فأخدها وليد وفتح الدولاب… وبصتله روني بذهول وقالت : ده فعلاً مليان هدوم… وهدايا أنت فعلا مش ممكن يا وليد…
وحضنته بحب وقالت : ربنا يخليك ليا يا أحن راجل في الدنيا كلها…
وهو لف اديه حواليها وحس بنغزه في قلبه من كلمة “أحن راجل” وخاف من بعدها عنه في يوم من الأيام… ودعا بكل كيانه وقال : ربنا يخليكى ليا يا حبيبة قلبي وما يحرمناش من بعض ابدًا..
وارتاحوا شوية وبعدها اتغدوا… وناموا ولما صحيوا صلوا… وقال وليد : ايه رأيك يا روني… تحبى نروح نكشف عشان نطمن على النونو…
فهزت روني رأسها بالموافقة وقالت : اه طبعا نفسي أشوفه قوي وأكلمه وهحكيله حكايات كتيييير قوي…
ابتسم وليد وأخدها أوضتهم… غيروا هدومهم… وراحوا يكشفوا… وأثناء عمل السونار قالت روني : وليد أسال الدكتورة هو إزاي جه النونو في بطنى؟…
فبص وليد ليها واتفاجئ… وبلع ريقه ومش عارف يقولها ايه أو يطلع من الموضوع ده إزاي… وخرجه من الموقف ده صوت الدكتورة وهيا بتقول : دول اتنين توام…
فرجع وليد بص للدكتورة وبعدها بص للشاشة وابتسم بسعادة على حجمهم الصغير… ورجع وبص لروني اللي بتبص ليه بإستغراب… وهي مش فاهمة الدكتورة قالت ايه فرحه كده وقال : دول توام يا روني…
فقالت روني بذهول : بجد… طيب أسألها جم إزاي؟…
فتجاهل وليد سؤالها وسأل الدكتورة علي نوعهم بس بلغته أنه لسه مش ظاهر علي الشاشة… وكتبت لروني علي بعض المقويات وعلاج عشان الترجيع… وحددت مواعيد المراجعة الدورية ليها…

وأخد وليد روني وروحوا وكان في منتهى السعادة… بس روني كانت محتارة… إزاي حامل في توأم واللي قاله وليد ومرآة خالد محصلش؟… طيب ممكن يكون في طريقة تانية وهي دي السبب في حملها؟… طيب ايه هي الطريقة دي؟… وإزاي حصلت؟… وإزاي هي ناسية حاجة مهمة زي دي؟…. وحاولت تفتكر إزاي حصل حملها أو ايه الطريقة الثانية من خلال الأيام اللي عاشتها مع وليد في مصر…بس معرفتش تفتكر حاجة… وأتكسفت تسأل وليد عشان ما يحرجهاش بكلامه…