عرفته واحببته وزوجته في يوم واحد ج3

واتصدم وليد لما لمح روني قاعدة علي كرسي قدام بلكونتها تحت
المطر… ففتح البلكونة بتاعةه بسرعة… ورحلها عشان يدخلها من المطر والبرد… بس أول ما شدها وليد من دراعها عشان يدخلها أوضتها ويتكلم معاها… وقعت روني علي الأرض مغمى عليها…

فشالها وليد بسرعة ودخلها أوضتها… وشغل الدفاية واتصل بالدكتور وهو يجيب هدوم ليها من الدولاب… وغيرلها هدومها وراح هو كمان هدومه لأنها أتبلت من المطر ولما شال روني…

ووصل الدكتور وكان عايز ينقلها المستشفي… فرفض وليد… وطلب
منه يشوف الحاجات اللي محتاجها وهو مسؤل يوجدها ليه… وبرر رفضه بأن روني مريضة نفسيًا… ومش بتحب تخرج… ولو صحيت ولقيت نفسها مش في البيت ممكن حالتها تنتكس وترفض العلاج ده كمان…

وفعلا طلب الدكتور كل الحاجات اللي ممكن يحتاجها ووليد في وقت قياسي كان موفرها… وبعدها عمل الدكتور الازم… وأعطاها جلسة للتنفس الصناعي… وركبلها محاليل… وعرفه أنها ممكن تسخن فمحتاجة كمادات ومتابعة لليومين الجايين… ولو حالتها ما اتحسنتش هيضطروا ياخدوها المستشفي…

وبعد ما مشى الدكتور… قعد وليد جنبها وتنهد بيأس… وعنيه اتملت دموع… وباس دماغها وطبطب عليها… وبدأ يعملها الكمادات بنفسه بعد ما الممرضة ادتها كل الأدوية والحقن اللي كتبها الدكتور… وقعد وليد يتكلم معاها وأتمني أنها تكون سامعاه… بالرغم من أنه واثق من العكس…
ومسك كفها وقال بحزن : مش كفاية يا روني؟… لسه ما خلصش عقابك ليا؟… أنتي عارفه أنك اغلى حاجة عندى حتى من حياتي نفسها… عشان كده بتعاقبيني في نفسك… طيب بالله عليكي كفاية عقاب في نفسك… حرام عليكى عمرك بيعدي وأنتي بتضيعى أحلى أيام شبابك وصحتك… كل شوية باللي بتعمليه في نفسك… تعبتينى يا روني ما كنتش أعرف أنك عنيدة كده يا أم قلب أبيض…
معقول جرحي ليكي واجعك لغاية دلوقت زي الأول… عشان كده مش
قادرة تسامحيني… طيب يا حبيبتى أعمل إيه عشان ترضى عنى وتسامحينى…
شاورى بس على الطريق اللي لازم امشى فيه ويوصلني ليكي… يا روني أنا تايه من غيرك… ومش عارف أوصلك إزاي… مهما رضيت الدنيا عليا… ولا حاجة رضاها قدام زعلك منى…

فاكرة يا روني في أول جوازنا لما أخدتينى في حضنك وقولتى أن الحضن ده هيفضل مفتوح ليا على طول مهما حصل… وحشنى يا روني حضنك الدافي ده قوي… محتاجه قوي… محتاج ادخل جواه وتطبطبى عليا…
فاكرة لحظة ما أخدتينى في حضنك… حسيت أن ربنا عوضنى بحنانك عن حنان أمى… أنا اتيتمت من جديد من بعد ما حرمتيني منه يا روني…
ليه يا روني بتبعدينى عنك كده… أنتي أمي التانية… قبل ما تكونى أم أولادى… أنتي حبيبتى ودنيتى والفرحة اللي ساكنة قلبي…
كفاية يا روني اللي ضاع مننا وارحمينى وارحمى عجزى في بعدى عنك…
مش عارف اعمل إيه عشان تسامحيني… كل اللي نفسى فيه أنك تاخدى بالك من نفسك وبلاش تدمريها كده… أنا مش عارف أراضيكى… ولاعارف احافظ عليكى…
خدتك ورده ودمرتك بإيدى في لحظة جنون وغباء منى… ارجوكى ارجعيلى روني بتاعة زمان… وكفاية هجر حرام عليكى…