للهوي رأي آخر ج2
بقلم سارة حسن
زفر نفسًا عميقًا، الهب بشرته، وعينيه متعلقتان بعينيها الجميلتين قائلاً بهمس عذب:
_ ومن هايسمحلك بالوحدة تاني
اهتزت حدقتي عينيها وهمست بألم:
_ لأن غالبًا النهاية هاتبقى كده
تحرك إبهامه على وجنتها برقة:
_ وليه نوصلها لكده يا دهب، شيلي الحاجز اللي جواكي ده وكوني صريحة معايا
_ لأن دي المشكلة، مافيش بينا صراحة يا موسى. أنا، وغصب عني خبيت كاميليا وتصرفاتها المخجلة وتفكك عيلتي لدرجة مافيش بيني وبين أخويا أي علاقة، وأنت… كنت عارف كل حاجة، وشوفت بعينيك عرض من عروضها المخزية، وعلاقتك بقاسم، ده غير سرها مع والدتك واللي أنت مش عايز تقوله، كل ده ومش شايف بينا حواجز
صمت موسى ثم قال:
_ خلينا نفتح صفحة تانية
ابتسمت، وازداد التلألؤ في عينيها بالغلا:
_ أنا مابعرفش أهرب
_ ده مش هروب، إحنا بنحاول نتلاقي
انسابت عبرة شفافة بجانب عينيها، وأزاحها موسى بإبهامه وهمست بصوت يكاد لا يسمع:
_ أنت عايزنا نتلاقي؟
أومأ لها برأسه وبسمة صغيرة أجابها:
_ أنا عايز كل يوم الصبح أشوفك، بهدومك اللي بتعلي ضغطي، وسخريتك المستمرة، ونظرة عينيك المغوية، ولون شفايفك اللي بيخليني كل مرة…
لم يكمل موسى حديثه، ومال يقبلها، تخشب جسدها من هجومه، بداية من حديثه الذي رفرف قلبها، نهايتًا بقبلته الأولى لها، ابتعد وابتسم بخفوت قاتل لقلبها:
_ مابقتيش مخيرة يا دهب، الخروج من منطقتي محظور.
—
تم العقد في الأسفل، اقترب موسى من قاسم وبغير رضا قال:
_ انت شايف إن اللي بتعمله ده صح؟
بجمود أجابه قاسم:
_ وهو إيه الصح يا موسى؟ أسيبها تمشي، ولو مشيت مش راجعة تاني، ولا أفضل أنا عايش بذنب غلطة مش عارف أصلحها
بتريث قال موسى:
_ الضغط عليها برضو مش في صالحك، هي كمان في وضع صعب وليها العذر، أنا مش عارف كانت ردة فعلك إيه بالظبط، لكن انت صاحبي وعارف بتبقى عامل إزاي في غضبك
تنهد قاسم بكبت وقال باختناق:
_ أنا حاسس إني في معركة ومش عارف أحارب مين ولا أصلح إيه، جهة الشغل والمؤامرات اللي مش بتخلص عليّ، ولا كوابيسي اللي مش بنام منها، ولا أختي اللي مش متقبلاني وليها كل العذر، ولا فيروز واللي عملته فيها، ولا قلبي اللي مش هايتحمل خسارتها. قولي يا موسى أعمل إيه ولا إيه؟
كان موسى يستمع وعينيه تتسع بصدمة. لم يكن يتخيل أن يسمع تلك الكلمات من جبل مثل قاسم، ولن تخرج تلك الكلمات من رجل إلا عندما يفيض به الكيل ويستنفذ صبره وطاقته، وبمعرفة بصديقه يعلم جيدًا أنه لو جبهة العشق عنده اتزنت فكل الجبهات الأخرى أمرها هين بالنسبة له.
