نفوس قاسية ج3

احتضنتها فوزية وقالت:
– يا حبيبتي دا جوزك ومافيش فرق بين الراجل ومراته وبصراحة هاني دا راجل بجد، صحيح معرفتنا بيه من قريب بس طلع أرجل من عمك اللي أكل حق اليتامى وحرمهم من مالهم وقبل يشحتنا حقنا، بصي يا منال أنا عارفة أنك مش عايزة تتجوزي علشان ظروفنا خايفة هاني يقعدك من الشغل ومنلاقيش اللي نصرف منه بس أنا عايزاكِ تشيلي التفكير دا من دماغك ربنا مبينساش حد وأكيد هتفرج.

قبلت منال يد فوزية وقالت:
– أنتِ أحسن أم فالدنيا بس برودوا خليني مأجلة الجواز كمان شهرين لحد بس ما الدراسة تخلص والحمل يخف شوية من المصاريفـ كمان علشان أقدر أكمل حاجاتي أنا مش عايزة هاني يجيب لي حاجة زيادة و.

قاطعتها فوزية وقالت:
– متتخافيش هكمل لك باقي جهازك وحاجاتك كلها يومين وهقبض الجمعية خديها وهاتي كل الحاجات الناقصة وافرحي بقى وفرحينا معاكِ يا منال، خليني أحس أني نفذت وصية المرحوم والدك وسترتك فبيت جوزك زي ما كان بيتمنى ها قولتي أيه.

احتضنت منال فوزية وبكت بشدة فربتت فوزية رأسها وقالت:
– أنا هقوم أكلم هاني وأقوله يحدد الوقت اللي هو عايزه ماشي يا عروسة.

كاد هاني يجن فمنال لم تحاول مصالحته ولا السؤال عنه ألا حينما يسأل هو عنها فشعر بالضيق منها ولم يدرك وهو يقف أمام باب المشفى أن هناك أعين تراقبه بتمنى تنهدت ابتسام وهي تحدق بهاني وهمست:
– بس لو أطولك ساعة هنسيك اسمك وأنسيك اللي شاغلة بالك دي بس أعمل أيه.

لمعت عين ابتسام ورفعت حاجبها وقالت:
– وليه لا المهم أنه يبقى معايا ولو ساعة.

واسرعت إلى مكتبها واتصلت بكافيه المشفى وطلبت فنجان قهوة لها وكوب القهوة المفضل لهاني إلى مكتبها، أخذت ابتسام القهوة من العامل وأخرجت زجاجة صغيرة من جيبها ووضعت بعض القطرات في قهوة هاني وأسرعت إلى مكانه واقتربت منه وهي تبتسم بسعادة وقالت:
– أنا جبت القهوة نشربها سوا أيه رأيك.

التفت إليها هاني وقال:
– جاية فوقتها أنا دماغي هتنفجر.

ارتشف هاني القليل من قهوته ولكنه لم يكملها بسبب رنين هاتفه فوضع الكوب جانبًا ونظر إلى اسم فوزية وقال:
– عن أذنك دقيقة يا ابتسام.

مال هاني وأخذ كوب قهوته وابتعد عن ابتسام التي وقفت تتنهد بارتياح أنه سيكمل تناول القهوة ويتحقق لها ما تريد، ابتعد هاني عن سمع ابتسام وأجاب اتصال فوزية وقال:
– أزيك يا أمي عاملة أيه؟