نفوس قاسية ج3

ارتبك لطيف وقال محاولًا تحسين صورته أمام آدم:
– بلاش تحكم على الكل بنفس الميزان وانسى يا آدم وخلينا نرجع عيلة من تاني.

هز آدم رأسه رافضًا حديث خاله وقال:
– شايف دي.

اشار آدم إلى سهر النائمة على فراشها وأكمل حديثه وقال:
– دي هي كل عيلتي وابننا هيكمل العيلة دي وولادي كلهم هيبقوا سندني وعزوتي، أنا مش محتاج لناس بتبيع لحمها علشان الفلوس يا خالي ويكفيني قلب زي مازن ويسري ولا قلب زي قلب صفية والناس اللي عرفتهم وبيحبوا سهر وبيحبوني دول عندي هما العيلة، يا خالي العيلة مش مجرد خال ولا عم ولا جد، العيلة إنتماء حضن بيجمع الكل من غير مصلحة، وكلمة حلوة طيبة وضحكة من القلب، العيلة أن لما أقع ألاقي اللي يسندني ويقومني زي ما شوفت كده فاللي حواليا، والمحبه اللي بتجمعني بينهم مش لغرض ومن غير زيف أو غش، يا خالي أنت نفسك معرفتش تحب ابنك ولا تحسسه بالعيلة فعاوزني أنا أصدق أنكم لسه باقيين عليا، بلاش نضحك على بعض أنت مجتش ووقفت معايا ألا علشان مظهرك وبس وأنا مقدر وقفتك معايا، بس مش بصفتك خالي إنما بصفتك لواء شرطة ساعدني أرجع مراتي.

شعر لطيف أنه لن يستطيع إصلاح ما فسد بين أسرته وبين آدم فابتسم وقال:
– عموما لو غيرت رأيك فأي وقت هتلاقي بيتي مفتوح لك عن أذنك، وأه قبل ما أنسى الق\ضية أتحدد لها جلسه هي مجرد أمور شكلية ومش هيبقى فيها حكم على سهر دا دفاع عن النفس، وعلى فكرة النيابة فتحت التحقيق فق\ضية ق\تل رشدي وضمت القضيتين لبعض.

زرعت كلمات لطيف الخوف بنفس آدم فسأله بقلق:
– والجلسة أمته.

أجابه لطيف قبل أن يغادر:
– أخر الشهر يا آدم أشوف وشك بخير.

نظر آدم تجاه سهر وأحس بالقلق عليها فهو يخشى عليها من وقوفها في قفص الاتهام وسرد التفاصيل مرة آخرى على الملاء.

——————-

مرت الأيام ببطء على منال فمنذ رفضها تعجيل زواجها من هاني وهو قلما يحدثها فجلست تنظر من نافذتها شاردة الذهن ولم تلحظ فوزية التي جلست بجانبها فربتت يدها تنبهها إليها فنظرت إليها منال بعين دامعة فابتسمت لها فوزية وقالت:
– كنتِ فهمتيه يا بنتي بدل ما أنتِ قاعدة بالحالة دي وهو زعل وفهمها أنك مش بتحبيه.

هزت منال رأسها بالنفي وقالت:
– مينفعش أقوله حاجة زي دي يا ماما أنا مقدرش أتحمل أنه يحس ناحيتنا بالشفقة، أنا عارفة أنه لو كنت قولت له كان هيشيل عني الهم بس أنا مش هقدر كفايه الحاجات اللي كل شوية يجيبها والحاجات اللي اشتراها لاخواتي.