نفوس قاسية ج3

ابتسم هاني واحتضنها وقبل جبينها وابتعد عنها ليخرج حقيبة هدايا من خزانة الملابس وقدمها إلى منال وقال:
– بما أنك قولتي الكلام دا فأقبلي مني الهدية دي.

فتحت منال الحقيبة واخرجت منها نقاب أسود وآخر كحلى اللون فابتسمت وقالت:
– هدية مقبولة يا هاني.

وضعت منال الحقيبة على الفراش وقالت:
– أنا هروح احضر الغدا يلا ببقى شكلنا كده وحش وماما قاعدة لوحدها كل الوقت دا.

جذبها هاني إلى احضانه وقال:
– طيب مش هتلبسي واحد منهم دلوقتي.

دفعته منال عنها غير مصدقة وقالت:
– أنا فالبيت واللي برا دول اخواتي يا هاني لتكون ناسي اخواتي من بابا مش من حد غريب عن إذنك.

جلس هاني على طرف الفراش وجذب شعره يشده بقوة وقال:
– اخواتي ولا حتى عمك ولا ابوكي نفسه اهم كلهم رجالة ما تفهمي بقى يعني إيه غيرة.

عادت منال إليه لتفاجأه قائلة:
– أفهم أنت معنى الحب والغيرة الأول يا هاني لأن اللي أنت فيه دا هوس، ولو فضلت بالشكل دا يبقى هتصعب الحياة مابينا، لأنك كل يوم هتبقى أصعب من اليوم اللي قبله ويلا عيب أوي تفضل قاعد هنا وماما واخواتي برا، هناء حضرت السفرة ولا مش ناوي تتغدى معانا.

تحرك هاني باتجاها وقال:
– خلاص قايم معاكِ.

——————–

جلست داليا تتابع عملها في مكتب آدم محاولة كسب ثقة مازن الذي لم يتقبل وجودها حتى الآن، ولكنها تعاملت معه بحذر خوفًا من أن يتسبب في طردها من العمل، فجلست تنظر إلى الملفات وتدون ما بها في ورق خارجي ولم تلحظ مازن الواقف عند باب المكتب يتابع ما تفعل، واقترب منها فجأة ومسك يدها بقوة وهو يصيح:
– أنتِ بتعملي أيه وبتسجلي المعلومات دي فالورق ليه، ما هي متثبته على الكمبيوتر.

حدقت به داليا وقد شحب وجهها وقالت:
– أنا أنا أصل أنا بعمل لهم كود واهو اتفضل شوف بنفسك، أصل فكرت انظمهم بأكواد في الملفات برا وعلى الكمبيوتر، علشان لو أي ملف اطلب يبقى سهل نلاقيه وبعدين أنا معملتش حاجة غلط.

حدق بها مازن غير مصدق وقال:
– رغم أن مش مقتنع بس ماشي أما نشوف أخرتها معاكِ، هانت كلها أسبوع وآدم يرجع ونشوف سبب مجيك هنا الحقيقي إيه عن إذنك وياريت متشرفنيش بطلتك فمكتبي.

ما أن غادر مازن حتى تنفست داليا الصعداء وهي تهمس:
– اوف مكنتش عاملة حسابك خالص بس مش مهم هعرف بردوا انفذ اللي أنا عايزاه ولا أنت ولا أي حد هيقدر يمنعني يا مازن بيه.