نفوس قاسية ج3

حدقت سهر بآدم وهي تعلم أنها تمادت معه وتخطت كافة المحاذير التي وضعها، ولكنها أملت فيه كثيرًا فابتعدت عن داليا ووقفت أمامه وقالت:
– أنا عارفة أني بطلب منك حاجة كبيرة أوي وأني بتخطى حدودي، بس أرجوك يا آدم بلاش تأذيها خلي الأذى والانتقام يجي من حد تاني غيرنا، أرجوك دي بنت وبعدين لا أنا ولا أنت نعرف الظروف اللي خلتها تكون بالشكل دا وتأذي اللي حواليها، اكيد في حاجة فحياتها منعرفهاش أثرت عليها، فبلاش احنا كمان نكون زي الحاجة اللي خلتها انسانة مش كويسة كده، خلينا نسامح زى ما ربنا قال يمكن تراجع نفسها وتعرف أن زي ما في الوحش في الكويس والحلو، وحياتي يا آدم وأوعدك أني مش هقف قصادك تاني أبدًا مهم حصل.

تنهد آدم باستسلام فملامح سهر تعذبه رغم طلبها المستحيل، فحول نظره إلى وجه إسماعيل الذي جلس براحة على أحد المقاعد ينظر لهم كأنه يتابع أحد الأفلام المثيرة، ورفع حاجبه وهو يبادل آدم النظرات وهز رأسه رافضا وقال:
– لا أنسى أنا مش هخالف القانون علشان خاطر طيبة قلب مراتك أنسى يا أستاذ آدم.

بكت سهر حينما أنهى إسماعيل حديثه فعبس آدم في وجه إسماعيل وقال:
– إسماعيل وبعدين.

وقف إسماعيل وقال بتهكم:
– يا دي إسماعيل ويا دي المعرفة الهباب اللي خلتني اتعامل معاكم من الأساس، أنا من ساعة ما عرفتك وأنا بخالف القانون وشكلي فالأخر هعتزل وأقعد فالبلد أزرع حته الأرض واربي العيال علشان اخلص منك.

ابتسم آدم وقال:
– هعوضهالك بالراس الكبيرة غسان باشا.

لكزت سهر كتف آدم فجأة وهي تشير لمازن فلاحظها مازن وقال:
– يلا بينا يا إسماعيل دي سهر هتطلع البلد كلها براءة.

وتوجه إلى داليا وجذبها خلفه وتسلمها منه إسماعيل الذي نظر لها باحتقار وقال:
– خسارة فيكِ دمعة واحدة من الناس دي، أنا لو عليا اسجنك لحد ما تقولي حقي برقبتي اتفضلي أدامي هاتي الملفات والتسجيل اللي عندك، وربنا يسهل وأعرف اخرجك من الليلة دي.

وبالفعل تم لسهر ما أردات فقد وضع إسماعيل داليا في قائمة الشهود لتقديمها كافة الأدلة التي ادانت غسان، وخرجت داليا من سرايا النيابة بعدما صفعتها سهر بمساعدتها والعفو عنها، وها هي اليوم حاولت أن تنال منها أخر معروف وهو السماح لتختفي عنهم للابد.
عاد آدم إلى الداخل بعدما اطمئن لاختفاء داليا عن ناظريه واطمئن لإنشغال سهر بأطفاله، فجلس بجانبها يحمل عنها جنة ويقبلها فحدقت به سهر وقالت:
– حبيبي يا دومي لما تيجي تبوس جنة يبقى لازم تبوس رشدي وعمران كمان، ولما تشيل جنة يبقى تشيل رشدي وعمران كمان، علشان لو أنت اهتميت بجنة بس أنا هزعل منك وزعلي وحش أوي يا دومي.