نفوس قاسية ج3

ربت محمود على كتف آدم وقال:
– مبروك يا آدم ربنا يجعلهم من الذرية الصالحة يارب أنا هروح أبشر ماما و.

اوقفه آدم وقال بسعادة:
– لا أنا اللي لازم اطمنها زي ما طلبت.

ومد آدم يده بهاتفه إلى محمود وقال:
– كلم مازن وخليه يروح الفيلا هيلاقي شنطة جاهزة يجيبها ويجي معلش يا محمود أنا هتقل عليك.

ابتسم محمود وقال:
– متقولش كده المهم أننا اطمنا على سهر و.

صمت محمود حينما تبدلت ملامح آدم واحتقن وجهه فقال مسرعًا:
– أنا مقصدش حاجة على فكرة وبلاش نظراتك دي سهر دلوقتي بقت فمقام أختي.

عقد آدم حاجبيه وقال:
– أتمنى فعلًا إنها تبقى أختك يا محمود لأيى خايف على سهر لو حرمتها من ماما صفية لو حسيت بغير كده وأنت فاهم عن إذنك.

زفر محمود بحدة بعدما غادر آدم ونهر نفسه وقال:
– أعقل بقى مبقاش ينفع تفكر فيها تاني حاول تنساها بقى وكمل حياتك.

ما هي إلا لحظات حتى خرجت الممرضة وهي تدفع الفراش الذي ترقد فوقه سهر، فحدق محمود بوجهها الشاحب وتنهد بألم وكاد أن يمد يداه، ولكنه أشاح بوجهه عنها وأبتعد وأدار وجهه ليرى آدم يتقدم منه مسرعًا وبجانبه والدته، فتوجه محمود إلى صفية ومد يده لها فاستندت صفية عليه وربتت على وجهه فأغمض محمود عيناه ليفهم مواساة والدته له.
استغرقت سهر وقتا طويلًا لتستيقظ فحاولت أن تفتح عيناها ببطء وهي تشعر بالألم، فتأوهت بصوت منخفض وأحست بيد تتلمس يدها، أبتسمت وهي تفتح عيناها بشكل تام وتنظر إلى وجه آدم المحدق بها بخوف فقالت:
– فين رشدي وعمران أنا عايزة أشوفهم.

رفع آدم عيناه عنها ووجه حديثه لصفية وقال:
– خلاص مبقاش فدماغها إلا رشدي وعمران وأنا اتركنت على الرف هو في ظلم اكتر من كده.

حاولت سهر أن تعتدل ولكن ألمها أزداد فاحتضنها آدم وقال:
– أهدي ومتتحركيش أنتِ ولدتي قيصري يا حياتي بعد ما صفيتي دمي من الرعب.

ضحكت صفية وقالت:
– معلش يا آدم هي كده الولادة البكرية بتبقى صعبة وليها طقوس خاصة.

ضحكت هدى وقالت:
– معاكِ حق يا ماما والله ربنا يكون فعونا من تعب الولادة دا حاجة صعبة أوي، ربنا وحده العالم بيها ما بالك بقى بسهر وولادها.

كادت صفية أن تتحدث ولكنها صمتت عندما دخلت منال وهي تنهج وتقول:
– معلش اتأخرت عليكم على ما هاني رجع من المستشفى وجابني، مبروك يا سهر مبروك يا أستاذ آدم ربنا يجعلهم من الذرية الصالحة يارب ويتربوا فعزكم.