نفوس قاسية ج3

ربتت سهر على وجنة آدم وتهربت من حديثه وقالت:
– ولما سألتني فالشهر التالت كان إيه بص يا حبيبي لما أحس بوجع الولادة هقولك وأكيد أكيد مش لوحدك اللي هتعرف أني بولد.

تنهد آدم وقال:
– لا بس المرة دي أنا فعلًا حاسس إنك بتولدي.

حدقت سهر به بدهشة وحاولت الوقوف فاسرع آدم وكاد أن يحملها فرفضت وقالت:
– لا يا آدم قلت لك متشلنيش تاني علشان ظهرك أنت على فكرة بقيت مهمل أوي فصحتك بتراعيني أنا وجاي على حساب نفسك، الأسبوع اللي فات لما صممت تشيلني الدكتور حذرك علشان رجليك ممكن بقى حبيبي ميتهورش و.

صمتت سهر فجأة وضغطت بقوة على كف آدم وقالت:
– آدم الظاهر إن كلامك المرة دي صح.

أجابها آدم وهو يضع يده على ظهرها يدعمها لتقف وقال:
– على فكرة أنا كل كلامي صح بس أنتِ اللي بتحبي تعندي و.

صرخت سهر فيه بحده وقالت:
– أنا بولد يا آدم بولد.

أحس آدم بالخوف فصرخات سهر توالت دفعة واحدة خلال ثوان، فحملها رغم اعتراضها وبكاؤها وغادر وهو ينادي على أحد الحرس ليأتى إليه مسرعًا بالسيارة، فجلس آدم وهو يحتضن سهر بخوف يذكرها بتمارين التنفس، ولكن أنينها وتثلج يداها أعلمه أن الأمر ليس بطبيعي، فهمست سهر وهي تحاول كتم آنينها:
– آدم كلم ماما صفية أنا عايزة أشوفها أرجوك.

أجرى آدم اتصاله بصفية ولكنه استمع إلى صوت محمود يجيبه فقال بتوتر:
– أنا آسف للازعاج بس سهر بتولد ومحتاجة ماما صفية معاها احنا فالطريق للمستشفى ياريت تحصلونا.

أنهى آدم كلماته وأغلق هاتفه ونظر إلى سهر بقلق فقال وهو يمسح عن وجهها العرق:
– على ما نوصل هتلاقيها معاكِ اطمني يا سهر.

ابتسمت سهر بضعف ورفعت يدها ووضعتها على وجنة آدم ونظرت إلى عيناه وقالت:
– آدم أنا بحبك أوي وبحب ابص لعينيك علشان بحس معاهم بالأمان والراحة وعايزاك تعرف أني سعيدة أوي علشان أنا بين إيديك دلوقتي، وبحمد ربنا على حبك ليا وإن عمري ما حبيت غيرك، علشان كده عاوزة أطلب منك طلب لا هي وصية يا آدم، أرجوك لو جرالي حاجة أوعى تكره ولادي أوعى تعاملهم زي ما بابا كان بيعاملني أوعى تقسى عليهم فمرة، حبهم أكتر ما أنت بتحبني أوعدني يا آدم أنك هتراعيهم وهتعوضهم غيابي أنا هسيب لك قلبي معاهم آه آدم احضني جامد أنا أنا.

ضاعت كلمات سهر مع صرخات آدم التي أطلقها رافضًا فقدانها للوعي بين يديه، فانهمرت دموعه وهو يقبل وجهها ويقول:
– هتبقي بخير يا سهر أنا مش هعرف أعيش من غيرك فوقي يا سهر أرجوكِ كلميني حرام عليكِ يا سهر متسبنيش.