روايه احببتك يا صغيرتى

والحرقه الفى قلبى وكل الاحداث الحصلت من وقت ماعمل الحادثه

وكل تصرفاته معايا افتكرتها

وفضلت اعيط لغايه لما تعبت وقمت اتوضيت وصليت واخدت برشامه

مسكن ونمت وعدت عليا الايام البعدها وانا حالتى النفسيه سيئه

جدا؛

كتير كنت اروح واقعد جنب باب اوضته وبكون هاموت وافتح الباب

وادخل عليه عشان اشوفه واطمن عليه بس بخاف ينفذ تهديده

ولو دخلت الاوضه تانى يطلقنى.

ودايما كنت باسال خالتو عنه وعن احواله وصحته

ومره قلت لخالتو:حسن وحشنى قوى يا خالتو تعالى ادخليله ؛

انتى واتكلمى معاه وانا هاقف بره من غير ما يحس بيا؛

بس اسمع صوته ربنا يخليكى يا خالتو ما تقولى لا.

فطبطبت عليا وقالت:ربنا يصلحلك الاحوال يا هدى يارب ويشفيك

ويهديك يا حسن يا ابنى.

ودخلت فعلا وفضلت تتكلم معاه وهو كانت اجاباته مختصره جدا ؛

وشكله مش عايز يتكلم وانا كان واحشنى جدا وكنت حاسه انى

بتعذب بقربه وبعده

وكنت هاتجنن عليه وانهرت وقعدت على الارض وفضلت ابكى بس هو

حس بيا

وقال لخالتو:هى هدى بره؟

وهنا خالتو ارتبكت وقالت:وهيا ايه الهيجيبها بره بس؟

بس حسن كشفنا وقال بمنتهى العصبيه:هيا وصلت انكم

تستغفلونى عشان عاجز بتضحكوا عليا

وهيا عشان قلت ما تدخليش الاوضه تقف تتجسس عليا من بره

يعنى اتصل اجيب الماذون دلوقت واخلص الموضوع ده عشان تحترم

نفسها وتخلى عندها كرامه وتبعد عنى.

انا ما قدرتش اكمل سماع اهنات ووقفت وطلعت فوق اوضه الالعاب

الرياضيه

ولاول مره اشوف عليها التراب بالشكل ده لان من قبل الحادثه

كنا مشغولين فى جهازنا وتوضيب الجناح وانا وهو ما طلعناش هنا

لينا كذا شهر؛

والتراب ملا المكان.

ومسكت قماشه ومسحت حاجات بسيطه وما قدرتش

وقعدت على الارض وانا ببكى بحرقه ونار جوايا من البيحصلنا انا وهو

والحاله الوصلنا ليها.

إغضب ، إغضب كماتشاءُ واجرح أحاسيسي كما تشاءُ

فكلُ ما تفعلهُ سواءُ ، وكلُ ما تقولهُ سواءُ

فأنتَ كالأطفالِ يا حبيبي ، نحبهم مهما لنا أساؤوالنا.

كتير ماما وخالتو وعمو اتكلموا معايا وقالوا فتره وهتعدى وحاولوا

يصبرونى؛

بس لو اى اهانه من اى حد بتكون صعبه؛

من حسن بتكون اصعب واصعب وكفايه موضوع الطلاق

الكان روحى هيا البتخرج منى مش انى هابعد عن حد بحبه وبس.

ورجعت اوضتى وفضلت افكر كتير لغايه لما اتوصلت لقرار وهانفذه من

بكره ان شاء الله وزى ما تيجى بقا احنا مش هنفضل طول عمرنا كده