قضية شرف ج2
بقلم فاطمة عيد
تضحك ليلى : مرسيي يا قمر
( تخرج وتسيبها وهاجر قاعده على الباب زهقانه وحسين لسه نايم .. تقوم وتدخله الاوضه )
هاجر بدلع : سونسونتى
( تقعد جنبه وتحرك ايدها على كتفه )
هاجر بابتسامه : يا سونه
( حسين يفتح عينه براحه ويبصلها )
حسين بصوت نايم : فى ايه يابت
هاجر تغمزله : قوم لبستلك الجلبيه الصفرا اللى بتحبها .. ام ترتر احمر
( تضحك بصوت عالى ودلع )
حسين يغمض عينه تانى : مش فايق
( هاجر تلعب فى شنبه ودقنه )
هاجر بمياصه : يا سونسون زهقانه بقي
حسين يتاوب : بعدين يا جوجو
هاجر تزعق : ما تقوم يا راجل الله .. هتحايل عليك ولا ايه
( حسين يتفزع من تقلبها دا وزعيقها )
حسين : يخربيتك صوتك قلب كده ليه
هاجر : قوم اخلص وعدى يومك دا
حسين : مش قادر يا وليه سهران طول الليل
هاجر : وانا مالى ماانت اللى سهران مع اصدقائك البوابين وسايب الملبن بتاعك
حسين : طب انام شويه
( هاجر تتعدل وتقف )
هاجر : اه انت شكلك كده مش هتيجى غير بالعنف
حسين : لا والنبى ما قادر
هاجر : خلاص دقت ساعه العمل
حسين : يعنى ايه ؟
هاجر تبصله بجراءه : دقت ساعه السعد
حسين : عاوزه ايه يابت !
هاجر تفك الاشرب : دقت ساعه الانتصار
حسين يضحك على شكلها : ايه يا مجنونه مالك
هاجر وهى بتنط عليه وبمياصه : الى الاماااااااااام
( حسين يتصدم باللى بتعمله وبعدين يضحك ويحضنها .. عند سليم قاعد هو وكارم فى المكتب )
كارم : هتفضل كده كتير
سليم : هفضل كده ازاى ؟
كارم : هتسيبها تضيع منك يعنى
سليم باستغراب : هى مين !
كارم : ميار
سليم باستنكار : ميار !! .. ايه اللى بتقوله دا .. دى اختى
كارم يضحك : انت بتضحك عليا ولا بتضحك على نفسك .. انت عينك ناقصه تطلع قلوب لما تشوفها
سليم : لا طبعا انت اكيد فاهم غلط
كارم : والله طب وايه الصح بقي .. قولى كده اشمعنا بتهتم بيها هى مع ان فرحه كمان قدامك .. لو زى ما بتقول بتهون غياب عبدالله يبقي كنت اهتميت بالاتنين
سليم يتوتر نوعا ما : اصل .. ااااا .. م م ميا…………
يقاطعه كارم : اه اقعد تهتهلى بقي .. بقولك ايه البت حلوه ………
( لسه هيكمل يقاطعه سليم بغيظ )
سليم : ايه البت حلوه دى .. ماتتلم انت كمان
كارم يضحك : وتقولى مش فى دماغك
سليم : هى اه مش فى دماغى بس برضو ميصحش نتكلم كده على اخت عبدالله
كارم : ولا ميصحش نتكلم كده على مدام سليم المستقبليه ؟
