قضية شرف ج2

ميار بهيام : ليه ماانت قمر من غيره اهو

( سليم يبصلها شويه وبعدين يضحك )

سليم : مالك ؟

( تاخد بالها من كلامها وتتحرج جدا .. ولسه هتتكلم )

…… : حلو اوى الشغل دا

( يبصوا الاتنين يلاقوه يوسف وجنبه امل .. سليم يتحرج وميار تقلق نوعا ما )

ميار بتوتر : احم .. يوسف ان………..

( يقاطعها يوسف اللى بص لسليم وبيكلمه )

يوسف بنرفزه مكتومه : مش عيب يا سياده المقدم لما تستغفل صاحبك التعبان وتقعد مع اخته

سليم : انت فاهم غلط انا ب…………..

يقاطعه يوسف : فاهم غلط ايه وزفت ايه !!! .. دا صوت ضحككوا واصل لبره

ميار : يوسف مسمحلكش تتكلم كده

( يبصلها بحده )

يوسف : مش عاوز اسمع صوتك تمام

( تضايق من اسلوبه معاها قدام سليم وامل )

سليم : يابنى افهم .. احنا مفيش حاجه بينا .. كل الحكايه اننا صحاب وبس

يوسف بصوت عالى نسبيا : كده ومفيش حاجه ؟ .. اومال لو فى بقي هتعملوا !!!!!

( امل تحاول تشد يوسف وتسكته بس يوسف يزق ايدها ويبص لسليم )

يوسف : لو انت فاكر عشان عبدالله تعبان فاشطا محدش واخد باله اخدها واسرح بيها شويه براحتى فتبقي سورى اهبل .. فاكر ان محدش هيحاسبك يعنى ولا ايه !! .. طب هى صغيره ومش فاهمه حاجه تقوم مستغل دا فى صالحك ؟!!!

سليم : انت ايه اللى بتقوله دا !!! .. انا مستحيل اعمل كده ولا اسرح بيها اصلا .. انا عمرى ما سرحت ببنت ولا فكرت استغل واحده قبل كده .. مش يوم ما افكر هتبقي اخت صاحبى .. بطل الهبل اللى بتقوله دا .. احنا كنا بنشرب قهوه بس وطالعين .. مش فاهم انت عامل حوار على ايه .. انت مش قافشنا فى شقه مفروشه يعنى

( يوسف يمسكه من لياقه قميصه )

يوسف بعصبيه : طب اتجرأ كده واعملها وانا امحيك من على وش الارض حتى .. عيلتى خط احمر فاهم ولا لا

( ميار تشده جامد وسليم بيبصله بهدوء )

ميار بزعيق : بطل اللى انت بتعمله دا .. الناس بتبص علينا .. وبعدين بدل ما تيجى تنصحنى انصح نفسك الاول

( يوسف يسيب سليم ويبصلها )

يوسف : متقارنيش نفسك بيا .. انا راجل واعمل اللى يعجبنى .. انما انتى لا

ميار : يا سلام .. وعلى اساس اللى معاك دى راجل يعنى !! .. ما هى ست هى كمان واكيد فى راجل زيك فى عيلتها هيقول نفس الكلام .. اللى بيته من ازاز ميحدفش الناس بالطوب ماشي

( يوسف يتعصب جامد من كلامها ويدوب مسكها من دراعها جامد .. سليم يقف قدامه ويشدها منه )