على الرقاب قدر نافذ 2
بقلم شاهيندة
ترك يدها قائلا بجزع:
-انتى قصدك ان مشاعرك كانت تمثيلية قصدتى بيها تعلقينى بيكى وبعدين تمشى وتعذبينى ؟!
لم تجبه وإنما طالعته ببرود فأردف قائلا بغضب:
-معقول إنى إتخدعت فيكى بالشكل ده،معقول تكونى بالقذارة دى؟
قالت بسخرية:
-لا ..أرجوك..عذاب إيه اللى بتتكلم عنه،إنت مش آخد بالك إن حضرتك معشتش على أطلال حبى لمدة سنة حتى،ده انت إتجوزت علطول وعايش حياتك بالطول والعرض ولا كأنك عرفتنى وحبيتنى زي ما كلامك بيقول،فبلاش تمثل دور الضحية لإنه مش لايق عليك.
عقد حاجبيه قائلا:
-إنتى تخرسى خالص،إنتى متعرفيش حاجة عنى ولا عن مشاعرى..كويس إنى قابلتك من تانى ،عارفة ليه؟عشان أبطل الهبل اللى كنت عايش فيه وأفوق ،وأقدر مراتى اللى مكنتش عارف أسعدها بسببك انتى وبسبب لعنة حبك..دلوقتى هقدر أكمل وأنا…..
أمسك رأسه فجأة يضغط عليها بقوة،فعلته تلك مع شحوب وجهه أصاباها بالقلق،فإقتربت منه بسرعة تربت على كتفه قائلة:
-مهران إنت كويس؟
نفض يدها عنه قائلا:
-بعدى عنى.
تراجعت خطوة بينما عاد ليمسك رأسه بكلتا يديه،وهو يإن لتقول بصوت قلق:
-مهران….
قاطعها بجلوسه المنهك فجأة فرأت تلك الدماء التى تنزف من أنفه لتقول بجزع:
-مهران انت بتنزف .
اقتربت منه تجلس على ركبتيها أمامه وهي تمسك بشالها وتمسح به الدماء من على وجهه ليطالعها بعينيه التى تعلقت بعينيها فتوقف الزمن ،لم يعد هناك غضب او لوم او عتاب ..لم يعد هناك زيف فى المشاعر ..لم يعد هناك سوى شعورهما الذى لاريب فيه..عشق خالص لا تشوبه شائبة،كانت هي اول من قطع تلك العلاقة وهي تبعد ناظريها عنه قائلة:
-وطى راسك عشان النزيف يقف.
قال بصوت منهك:
-شذا..انا…
قاطعته قائلة بحزم:
-قلتلك وطى راسك عشان النزيف يقف.
أطاعها بصمت ،نهضت تنوى إخبار أحدهم ليساعده فوجدت (محمد)قبالتها يناظرها ببرود،فقالت له بسرعة:
-إلحق مهران يامحمد،بينزف مش عارفة ليه؟!
إقترب (محمد)من (مهران)يفحصه بسرعة قبل أن يقول:
-متجلجش يامهران،الموضوع باذن الله بسيط،لكن عاخدك المستشفى عشان أفحصك ونطمن أكتر.
هز (مروان)رأسه ببطئ وهو منهك الجسد و يشعر بوجع فى رأسه لايحتمل..قالت(فدوى):
-أنا هاجى معاكم؟
قال(محمد)بإستنكار:
-تاجى فين بس؟خليكى إهنه،عشان تبلغيهم باللى حوصل ومتخرعيهمش..الموضوع مش كابير وآنى هبجى أطمنهم بالمحمول.
