على الرقاب قدر نافذ 2

تأوهت من كلامه وهي تعض على يديها وتقول من بين شهقاتها :
_ مابستهلش اللي عملتو عشاني ولا بستاهل حنانك ياخوي ..ورحمة أمي سامحني ، سامحني على اللي عملتوا أنى ماجبتلكمشي غير وجع الجلب والراس من يوم يومي .

رفع وجهها نحوه وقال :
_ تعملي اللي تعمليه مكانك في الجلب ماعيتغيرشي ولا غلاوتك هتنجص ، انتي جطعة من جلبي من لحمي ودمي وأمانة ابوي وامي ربنا يجدرني وأكون كدها ، لو عملتي حاجة غلط أكيد أني اللي هكون مجصر فى حجك ومانتبهتش عليكي، أني خابر يازبيدة إن الدنيا جات عليكي جوي وماكنتش الخي الشديد اللي تجدري تتسندي عليه مش لاني ماوجفتش جمبك لأنك كنتي عنيدة ومابتسماعيشي كلمة من حد ، حتى عباس ياما جلتلك الراجل دا مش من مجامك ماليكيش صولح بيه بس انتي تبتي فيه أكتر ومع اكده مازعلتش جلت خيتي وحبت المهم تتهنى ، الحاجة الوحيدة اللي حرمتك منيه ورث أبوكي مش لأني كلت حجك ،لاه أعوذ بالله حجك على راسي لو ماخدتهوش إنتي هيبجى لبتك بالحفظ والصون ، عباس كان طامعان فيكي عشان اكده وجفتلك في حجك ، ياخيتي ماهما اختلافنا احنا بشر بس عمرنا ماعنفرط ببعض .

قبلت يده وقالت :
-احب على يدك ياخوي الحج بتي ، نوار بتضيع مني ياعسران ..نوار ضاعت ..بتي ضاعت بتي ضاعت .

وراحت تلطم وتضرب على صدرها ، جلس( عسران) بفزع أمامها وأمسك يدها وهو يقول :
_ اتهدي اكداه عشان افهم بتجولي إيه ،نوار فينها ؟ ضاعت كيف البت ؟

فأجابته وهي تصرخ :
_ كله مني ..كله مني ،أنا خليت بتي تترمي فى حضن الغريب بسبب حجدي وجلبي الأسود ، مارعيتش بتي ولا اهتميت بيها ، كت بقارنها دايما بالبنتة التانيين خليتها ماتعرفشي روحها ، اول ماحد جلها كلمة حلوة نطت فى حضنه ..

انقبض قلب (عسران) وراحت افكاره تعصف إلى إحتمالات لايحمد عقباها فقال بغضب :
_ البت فين يازبيدة انطجي ..يانوار !

استقامت معه وتعلقت في تلابيبه وهي ترجوه قائلة :
_ احب على يدك استر على بتي ماعيزاشي حد يعرف ..ورحمة ابوي وامي وطي حسك .

وقف أمامها مذهولا وهي تبكي بهستيريا فقال بحزم :
_ انطجي ياحرمة بتك فين ؟

خرت( زبيدة )على الأرض جالسة وقالت :
_ بتي اتجوزت عرفي من ولد عوالي بنت الشيخة خضرة ، ضحك عليها وهتك عرضها ،اتعلجت بيه هملتنا وراحت حداه ، بتي وطت راسنا ياعسران ، بس مالهاش ذنب أنا اللي وصلتها لكداه أنا اللي خليتها تحس إنها ماعتتحبش، لما لجت حد كذب عليها صدجته ..انا عايزة بتي ياعسران وماعيزاشي لاورث ولا مال ولاحاجة من الدنيا دي ، جلبي اتحرج ياخوي ..جايدة جواتي نار ماعتتطفاشي ..رجعلي بتي احب على يدك .