على الرقاب قدر نافذ 2

قالت بغضب:
_ الموت جليل فيك ياجليل المُروة ،فاكر بعد عملتك السودا هتنفد مني اياك .

ظهرت( عوالي) على صوتهما وهي تهرول فحاولت دفع (زبيدة) القابضة على رقبة (راجي) الذي احمر وجهه وبدأ في الاختناق ، نجحت في ابعادها عنه فانحنى يلتقط أنفاسه وهو يسعل ، استدارت نحو (زبيدة )وصفعتها بقوة وهي تقول :
_ جنيتي ياحرمة جاية داري ومتهجمة على ولدي كيف البومة جرا لمخك حاجة ولا إيه ؟

اشارت (زبيدة) إلى (راجي) وهي تقول :
_ اسألي ولدك عمل ايه في بتي ، ولدك داس على شرف بتي ياست عوالي بجى دي آخرتها ، انا وبتي عملنالكم ايه عشان تأذونا ..

وزعت( عوالي) نظرها بين( زبيدة وراجي) وقالت بعدم استيعاب :
-بتك نوار ؟ ..مع ولدي ؟ مع راجي ؟بتخرفي وعتجولى إيه ياحرمة ..ماتنطج ياراجي ،المرة دي بتجول ايه فى يومك المطين انت وهي .

وقف( راجي) يلهث ويستند بيده على الحائط وقال :
_ أنا بعشج نوار وهي بجت مرتي ولو رايدة فرح هعملها إنما أسيبها ماتحلميشي ..نوار ملكي محدش يجدر ياخدها مني ..

صفعته والدته بقوة وهي تقول :
-مرتك كيف يازفت الطين ؟ عملت في البت إيه ياناجص ؟

ليقول بغضب :
_ أنا دخلت عليها عشان بحبها مش عشان العب بيها كيف مابتجولو وعتجوزها محدش ياجدر يمنعني ..

هم ليخرج فأمسكت به كل من هما من ذراع ودفعاه للخلف حتى ارتطم بالجدار ، رفعت (عوالي) يدها لتبعد (زبيدة ) والتفتت نحوه قائلة :
_ عتتجوزها كيف ، كنك نسيت إنت إيه ، تحب أفكرك ياراجي بيه !

قال(راجى)بقوة:
_ أنا كنت كيف سابج بسببك إنتي ، وبسبب النسوان اللي كيف العجربة دي ماعيحبوش غير الشر ، حب نوار خلاني أفتح عيني على الحجيجة ، من النهاردة ماليش صالح بيكم ولا بشغلاناتكم ومحدش يجرب مني ومن نوار هنبعد من اهنا ..هنبعد عن شركم .

فقالت (زبيدة )بغضب :
_ نجوم السما أجربلك من بتي ياناجص .

فقال مهددا :
_ جربوا اكده اوجفوا جصادي وعفضحكم جدام خلج ربنا واجول للعمدة على كل حاجة بتعملوها
هو اكداه ياموت وخراب ديار ..يانوار .

تركهما مذهولتان وخرج غاضبا لايرى أمامه ، جلست (زبيدة) على الكرسي وهي تضع كلتا يديها على راسها قائلة :
_ هتك عرض بتي ، ولدك مرمغ راسي في الوحل.

ثم انتفضت فجأة واقتربت من (عوالي) قائلة :
_ لتكوني عملتي عمل لبتي عشان تحب ولدك ، يمين بالله لو عملتيها لجتلك واحرج عفاريتك جواتك .