على الرقاب قدر نافذ 2

ضرب( محمد )جبينه بينما راح إخوته ووالده يحوقلون ويحسبنون ثم قال (عويس) :
_ والعمل ياحضرة الشيخ ؟

فقال الشيخ :
_ المسكينة فيها سحر جديم بس زال بأمر الله من أول التلاوة أما اللي هي فيه دلوك فلازمن نلاجي العمل عشان نبطله ماجدرتش أكمل تلاوة ممكن يوجف جلبها وتموت.

ضرب (محمد) بيده على الحائط وهو يقول :
_ حسبي الله ونعم الوكيل ،البت صغيرة عايزين منها إيه !

ربت والده على ظهره وقال :
-وحد الله ياولدي ، هطيب إن شاء الله .

فأردف الشيخ :
_ ياولدي ربنا قال ” لايفلح الساحر حيث أتى ” وقال ” لايصيبنا إلا ماكتب الله لنا ” خلي عندك حسن ظن بربنا هو بيختبر صبركم بالابتلاء العظيم ده ، وربنا عند حسن ظن عبده هتفرج مهما ضاجت ..
السحر معمولها في حاجة من نار لو فضلت السخونية عليها ممكن تتشل لاسمح الله لازمن تراجبوها لحدن مايفرجها ربك ، ماتشغلوش القرآن أو تجروه عليها عتأذوها مش عتنفعوها لأنه النوع ده من السحر بيكون عليه خادم لمن يحضرها بس عتعيا ولمن يروح عترجع كيف لول ماعتصدجوشي إنها فيها حاجة ..وهو والعياذ بالله مش عيبجى ملازمها طول الوجت أكيد عنده مشاغل ماهما أجوام زيينا لازمن يدورو أكل عيشهم ..
دور ياولدي بجهازها كلاته ورشوا عليه المية المرجية دية ودوروا كومان بالموكان اللي عملتوا فيه الفرح زين جوي .
حسبي الله في الناس اللي ماعتخافشي ربنا .
أهم حاجة لما تفوج ماتحسيسوهاش بحاجة وماتغضبوهاش هتبجى واعرة من غير ماتحس ممكن تاذي ، بس عموما هتبجى طبيعية تشتغل وتضحك وطيبة غير لما يحضرها عتتعب .
ربنا يسهل ونلاجي المصيبة ديه فين عشان نبطلها وترجع البنية للدنيا .

خرج الشيخ( وهدان )رفقة( عويس) بينما جلس (محمد) يحدق في( زهرة) التي انطفأ جمالها وبراءتها
وهي لاتزال في الثانية وعشرين من عمرها ثم تذكر ماقاله الشيخ وخرج ينادي :
-ياخالة أم هاني ..يامرات اخوي وينكم عاد ..

أتت كل منهما مهرولة فاردف :
-الاوضة دي عنجلبها شبر على شبر نفضوها، ودورو زين على اي حاجة غريبة ممكن تلاجوها ورشوا اي حاجة تلمسوها بالمي اللي اهناك أهيه .

نظرت كل منهما الأخرى فاردف :
_ ماهياش غول ماتخفوش هي نايمة ومش عتصحى بس لازمن ماتجروش قرآن أو تشغلوه في البيت لحدن مانرجع .

فقالت (فضيلة) وهي تضرب على صدرها :
_ ياليلة طين عتهملونا لوحدنا معاها .