خلف الظلال ج2
بقلم يسرا مسعد
قالت هاله بهيستريا : انا عايزه اعرف دلوقتى ..حرام عليك …انتو عايزين منى ايه ….
تنهد الرجل وهز رأسه اسفا واخرج من جيبه ” سرنجه رفيعه” وحقنها بدقه فى عنق هاله التى لم تتوقع هجومه عليها بالمحقن…
وماهى الا ثوان معدوده حتى تنرنحت هاله فى جلستها وشعرت بالظلام يقتحم عالمها وتراخت جفونها ومال رأسها باتجاه النافذه
فردد الرجل بلامبالاه : انتى اللى اضطريتينى لكده
اجابه السائق غاضبا بصوت غليظ: الباشا مش هيعجبه عملتك دى.. قالك ماتلمسش شعره منها
رد الرجل حانقا: وانا كان فى ايدى ايه… كانت هتفضل لحد ما نوصل للسخنه تصرخ وتعيط …كده اريحلها واريحلنا .سوق انتى وخلى بالك من الطريق ..مش عايزين لجنه توقفنا لنروح فى داهيه
وعلى الجانب الاخر …غادر رفيق المعرض بخطوات مسرعه واستقل سيارته الى خارج حدود القاهره واخرج هاتفهه وقام بمحادثه حاتم
فرد الاخير منزعجا : كنت بقالى كتير مستنى تليفون منك
رفيق بحسم: اسمعنى كويس …سالم خلاص بيجهز للعمليه الجايه
حاتم بشك : وانت ايش عرفك ؟
رفيق بغلظه: مش مهم عرفت ازاى …المهم تسمع اللى هقولهولك
قاطعه حاتم وقال: الاول ..انت متأكد انك مش متراقب ؟
رفيق : اطمن انا راكب عربيه مأجرها النهارده.. ومعايا شريحه جديده هرميها بعد ما اخلص..
اطمئن حاتم وقال : طيب كويس ..هاه كنت هتقول ايه ؟
رفيق : سالم شايل البضاعه فى المعرض بقاله اكتر من شهر
حاتم : ايه ..انت متأكد
رفيق بنفاذ صبر : ايوا ..اسمعنى وماتقاطعنيش… شايلها فى..3 عربيات وهيتحرك بيهم للمشترى بكره ..انا طبعا ما اعرفش لسه هيتحرك بيهم لفين وامتى لكن اول ما اعرف هكلمك تانى …بس هوا احتمال كبير اووى يكون بالليل متأخر
حاتم : خلاص انا هجهز قوه ونيجى نحاصر المعرض
رفيق معترضا : لاء طبعا… قمه الغباء ….لان اولا المعرض حواليه اراضى فاضيه … واى حركه هتبقى ملحوظه ..ثانيا انت المفروض تقبض عليه متلبس لان فى الغالب رجالته هما اللى هيتحركوا بالبضاعه ومش هيكون موجود معاهم
حاتم بقلق: ااه ..طيب ما ده برضه مش مضمون …ممكن يتحركوا فى اى وقت ومانعرفش انهم اتحركوا ..فهمنى انت بتعرف ازاى؟
اقر رفيق على مضض: مركب كاميرات مراقبه فى المعرض
حاتم مستبشرا: طيب جميل ننقل بقى المراقبه لمكتبنا هنا فى الداخليه
