خلف الظلال ج2
بقلم يسرا مسعد
استقلت هاله السياره برفقه حاتم وذهبوا سويا لمقر البنك وما ان وصل حاتم حتى قالت له هاله : تخليك هنا احسن ولا تيجى معايا ؟
حاتم : لاء طبعا هاجى معاكى يالا بينا
وفى الغرفه المغلقه الهادئه ذات اللون الرمادى الفاتح …كانت هاله تقف الى جوار حاتم ريثما ينتهى الموظف من الاجراءات الروتينيه الخاصه بعمله
حتى قال اخيرا : الخزنه تحت امركم يافندم اى خدمه تانيه
شكره حاتم وقال : متشكرين جدا 10… دقايق ونخلص ان شاء الله
انصرف الموظف بهدوء وفتحت هاله الخزنه بالمفتاح واخرجت لحاتم جميع الاوراق التى بداخلها حتى لمح حاتم شيئا يلمع بداخلها
فقال مستفسرا : ايه ده ؟
ردت هاله بلامبالاه : سبايك دهب
فغر حاتم فمه ونظر لها ببلاهه وقال : وبتقوليها عادى كده
نظرت له هاله بتعجب وقالت : والمفروض اعمل بيها ايه يعنى ؟
ضحك حاتم ضحكه متوتره وقال لها : تعملى بيها ايه …يعنى ايه تعملى بيها ايه ..هيا الناس بتعمل ايه بالدهب والفلوس ؟
قالت له هاله ساخره : ايه قصدك انى ابيعهم يعنى؟
اقترب حاتم من الخزنه وبدأ فى تحريك القطع الذهبيه الثقيله وقال لها فى ذهول : دوول 7 سبايك.. الواحده كيلو ..يعنى 7 كيلو دهب ..انتى عارفه الجرام الواحد وصل كام النهارده ؟
قالت هاله بتهكم : لا والله …اخر تعاملى مع تجار الدهب يوم مارحت ابيع شبكتى عشان البيه كان عاوز فلوس يدخل مشروع مع واحد
حاتم متشككا : يعنى انتى هتفضلى سيباهم كده فى البنك وتفضلى عايشه مع امانى فى الحاره وتدورى على شغل تاكلى منه عيش انتى وولادك ؟
هاله بحنق : انت عايزنى اعمل ايه بيهم يعنى ..انت نفسك عارف ان عادل كانت فلوسه حرام فى حرام ..عايزنى اربى ولادى بالسحت ؟؟
نظر لها حاتم متمعنا ثم قال خجلا : صح انتى صح …
ثم اغلق الخزنه بحركه قويه وقال لها : بس ممكن تتبرعى بيهم لاى جمعيه او مستشفى تعملى بيهم عمل خير اهو على الاقل الناس الغلابه … تستفيد بيهم
هاله : انا مافكرتش فى حاجه يومها ..اخدت الورق ونسيت الخزنه باللى فيها …بس انت كلامك صح ..فعلا بدال ماهم مركونين كده اهو الغلابه يستفيدوا بيها …يمكن ..يشفعله عند ربنا …ويحفظ ولادى من كل شر
نظر لها حاتم وقال : انا عارف ان نظرتى ماتخيبش ..ومن اول ماشوفتك حسيت انك انسانه جواكى نضيف اووى
احمر وجه هاله وقالت بخشونه : طيب يالا بينا العشر دقايق خلصو وزمان الموظف هيجى عشان يقفل الخزنه
