(أشباح المخابرات 1) من الفصل الاول الى الخامس

أشارت لها “رزان” بحنان، وحملت الغطاء تعدل لها منامتها، حتى استلقت بضعف تخفي من خلفه انهيارها.

بقيت “رزان” جوارها حتى غلبها النوم، فخففت الاضاءة وخرجت تهبط للاسفل، شاردة بحديث رحيق، تود لو نفذت حديثها وتلوذ بالفرار، وإذا بها تكاد تصطدم بأحدهم، والذي منحها نظرة كادت أن تخترقها لاكتشاف سبب الحزن المدفون بجوهر عينيها، وبالرغم من لهفة عينيه الا أن قوله أتى مُعاكسا:
_فوقي وإنتِ نازلة، المرادي لو وقعتي رجليكِ هتنكسر.

حاولت إظهار قوتها الزائفة أمامه، وبالرغم من أن قلبها يتهاوى فور رؤيته إلا أنها سحبته من خلفها واستكملت طريقها، فاذا بـ “كنان” يناديها متعجبًا:
_روز!

توقفت محلها دون أن تستدير إليه، فاقترب يسألها وهو يسيطر على مشاعر غضبه:
_عيونك مالها؟ هارون رفع إيده عليكِ تاني!!

ترنح عليها ابتسامة تهكم، واستدارت تقابله ساخرة منه:
_هيفرق معاك يعني!

قابلها بنظرة غاضبة من بنيتاه، فقالت وهي تخفي ألمها:
_لحد الآن لا، لكن هددني إني لو معملتش اللي هو عايزه هيعملها.

وأضافت ومازالت تمسك على ابتسامتها:
_وطبعًا إنت عارف هو عايز إيه بالظبط،بس المرادي كان منحط أكتر من الأول، وقالي أعمل أي حاجة عشان سيادتك تتكرم عليا وتقبل تتجوزني.

تلاشت ابتسامتها فجأة ورنت منه تسترسل بتحدٍ وشراسة:
_بس أنا مش هعمل كده، لإني خلاص مبقتش عايزاك يا كِنان حتى لو جتني راكع مش هقبل بيك.

وتابعت بوعيد تشفي به وجع جرحها النازف:
_مشاعري، قلبي مش هيكونوا غير للشخص اللي عنده القوة اللي يمسك بيها ايدي ويقف قصاد الدنيا كلها بشجاعة محارب عمره ما كان موجود فيك عشان انت جبان وضعيف يا كِنــان!

ماج الغضب وهاج في مُقلتيه، وصياحه العاصف يعصف بها، بينما تنقبض لائحته حول معصمها:
_اخرســــــــي، متحاوليش تستخدمي الاسلوب ده معايا يا رزان، أنا عمري ما مديت إيدي على واحدة ست فبلاش تكوني إنتِ أول واحدة أعملها معاها!

وتابع وهو يشدد من غرز أصابعه بذراعها، وصوته يخرج مكتومًا من بين أسنانه:
_لو بتخافي من هارون مرة خافيني ألف مرة، أخوكِ نفسه يجوزك ليا عشان خايف مني، عايز يشدد من قيده عليا، الأول بنوح والتاني بيكِ، بس أنا مش عبيط عشان أسلمله رقبتي.

وأضاف ومازال يشدد على يدها وصوته يعلو ليتردد صداه بين جدران القصر:
_أنا مش تيـــام أنــا كِنــــــــان التميمــي، لو عاش عمره كله يفكر إزاي يخضعني ليه عمره هينتهي ومش هيقدر يعملها.