عتاب عدوية المصري

خالد متحدثاً الي عتاب بهدوء وجدية : اللي حصل ده كابوس ياعتاب وربنا ستر وصحيتي منه فهماني.. قومي غيري هدومك انا قلت لامك انك هتسافري معانا بورسعيد.. ولو خايفه عالشغل انا بكرة او بعده هاجي اخدلك اجازة غصب عن اي حد.. اوعي ياعتاب فاهمة اوعي تحكي لاي مخلوق اللي حصل.. لانه محصلش حاجة

توجه خالد ومعه عتاب الي سيارته ليغادرا الي بورسعيد.. دخل خالد الي احدي الصيدليات واحضر مهدئا قويا فهو يعلم ان هدوئها مؤقتا

بعد ان تناولت عتاب المهدئ.. استسلمت للنوم طوال الطريق وكذلك والدتها.. بينما خالد رأسه علي وشك الانفجار.. فلو تأخر قليلا لكانت ضاعت ابنة عمه.. وعلي يد من.. اخذ خالد يستغفرالله ويحمده حتي وصلا الي بورسعيد ومنها الي بيته المقيم به مع زوجته واطفاله

بعد ان ساعدها خالد علي الصعود وهي ووالدتها التي تعجبت كثيرا من حالة ابنتها
خالد : تقريبا واحدة صاحبتها عملت حادثة وعتاب كانت حزينة جدا عليها
سميرة : لا قوة الا بالله ربنا يسترها معاكم يابني.. بس بردة مفروض تبقي اقوي من كده وتدعي لصاحبتها مش تعمل في نفسها كده.. بس هي ياقلب امها بتتلكك موجوعه وما صدقت حاجة تتحجج بيها.. منك لله يا اعتماد منك لله زي ما كسرتي قلب بنتي وقلب ابنك هو كمان

دخل خالد الي غرفته وتحدث الي زوجته قائلا:
اللي هقوله دلوقتي يا جنة لو لسانك نطق بيه لاي حد هيكون اخر ما بيني انا وانت
جنة بصدمة : وانت من امتي قلتلي علي حاجة سر وانا اتكلمت مع حد عنها ياخالد
خالد بحدة : المرة دي الموضوع مختلف وبحذرك اقسم بالله لو حد عرف هتصرف معاك باسلوب مش هيعجبك
بدأ خالد في سرد ماحدث.. وجنة تكتم بكاءها حتي لا تستمع اليهم والدتها
جنة : يانهار اسود.. وحصلها حاجة يا خالد اتأكدت انها سليمة
خالد : لو كان حصل حاجة كنت دبحته بايدي يا جنة ربنا رحمه من اللي كان هيحصله
المهم دلوقتي عتاب مش هتقدر تتحمل كتير لازم تخلي بالك منها علطول.. البنت اللي بتتعرض لمحاولة اغتصاب بتفضل فترة طويلة مرعوبة.. تخيلي بقي انها تتعرض للموقف ده جوة بيتها ومن سامح.. ان شاء الله تعدي الازمة دي ونشوف هنعمل ايه

ظلت اعتماد تبحث عن سامح دون فائدة.. هاتفه مغلق والساعه قد تعدت الرابعة فجرا ولم يعد.. ارتدت عبائتها وتوجهت الي بيت سميرة فقد اعتقدت انه ببيت شقيقتها يطلب العودة لعتاب
ظلت تطرق الباب بقوة دون فائدة.. نزلت الي الشارع.. اخبرها احد الجيران ان سميرة قد غادرت الي بورسعيد
اعتماد بصدمة : يا نهار مش فايت يكونوا ضحكوا عالواد وخدوه يتجوز عتاب هناك
صعدت مرة ثانية الي شقتها لتتصل برقم سميرة