عتاب عدوية المصري

يجلس ماجد يشاهد التلفاز بملل.. وتقف ذكية تعد الطعام من اجل حماتها وحماها فهي اصرت ان يقوم ماجد بدعوتهم لتناول الغداء
ماجد : يا حبيبتي قلتلك بنطلب اكل جاهز ونخلص
ذكية : لأ ميصحش دي اول مرة يتغدوا معانا بعد جوازنا.. وبعدين انا بطبخ احسن من المطعم
ماجد : اللي يريحك المهم نخلص
ذكية بحنان : خلاص يا ماجد بلاش تبقي قاسي كدة مهما حصل دي والدتك.. مينفعش تحاسبها هي امك وكانت عاوزة تجوزك واحدة مناسبة من وجهة نظرها.. ياريت تقابلها كويس وبلاش التكشيرة دي
اكتفي ماجد بالصمت بينما تتمني ذكية ان يمر اليوم علي خير
وصل ابراهيم والد ماجد وزوجته هالة الي شقة ابنهما.. استقبل ماجد والديه بترحاب وكذلك فعلت ذكية
ابراهيم : بسم الله ما شاء الله.. الأكل جميل يابنتي تسلم ايدك.. ما شاء الله يا واد ياماجد العروسة دكتورة.. وطباخة بريمو
ماجد : لا وكمان عندها استعداد تتحمل تعيش طول حياتها محرومة من الاطفال علشان خاطري شفتي بقي يا ماما انها تستاهل أحبها
هالة ببكاء ولا تستطيع الرد.. بينما تنظر اليه ذكية بحزن
ابراهيم : يابني ليه كده.. مين قالك الكلام الفاضي ده
ماجد بحسرة : تخيل سمعت خالتي بتتكلم مع مرات ابنها ليلة فرحي وبتقولها والله عروسة ماجد طلعت زي القمر مش عارفه ليه هالة كانت رافضة.. ردت مرات ابنها وقالتلها ولو مكنش حصل لماجد الحادثه وأثرت علي موضوع الخلفة عمرها ماكانت هترضي
تخيلي يا ماما حسيت بأيه ليلة فرحي وتخيلي عملت ايه مع عروستي.. ياريت وقت ما دعيتي عليا كنت مت فعلا وارتحت بدل ما افضل طول عمري عاجز.. نص راجل
هالة بانهيار وبكاء وندم : حقك عليا يا ماجد اسفه يابني.. ياريتني اموت انا واريحك
ماجد بانفعال وعصبية : ومين قال اني هرتاح.. مين قالك اني هقدر اعيش حياتي وانا محروم من نعمة اني اكون أب.. ليه كده.. ليه تكوني قاسية للدرجة دي
غادرت هالة وابراهيم بعد ان تدخلت ذكية وقامت بتهدئة حماتها قليلاً

ذكية وقد ابدلت ملابسها وتزينت لزوجها.. توجهت للبحث عنه لتجده يشاهد التلفاز
ذكية وهي تجلس امامه.. لتنظر الي عينيه قائلة:
انت بتحبني يا ماجد؟
ماجد : اعتقد انك متأكدة من حبي ليكي
ذكية : ولو بتحبني ليه مش حاسس بيا.. ليه مش قادر تفهم ان وجودك يكفيني عن الدنيا كلها.. هنستفيد ايه من عذابنا يا قلبي.. هتكون مبسوط لو ربنا رزقنا بطفل وانا حصلي حاجة
انا تعبت بما فيه الكفاية من الدنيا يا ماجد.. ايوة نفسي ابقي أم.. بس منك انت وبس.. يعني هدفي من الاطفال انها تبقي رابط بيني وبينك.. ولو ربنا مش كاتب يبقي خلاص وجودك جنبي هو الأهم
علشان خاطري سيب كل حاجة لربنا.. هنشوف دكتور وعشرة وهنعمل حقن مجهري هندور في كل مكان.. بس بلاش اليأس.. بلاش قسوة يانور عيني
ماجد بعشق يتحدث من بين نظراته : حاضر يا اجمل نعمة من ربنا.. انا اسف واوعدك مش هزعلك تاني