عتاب عدوية المصري

ابتعد حمزة بالفعل عن طلال.. ولكنه لم يبتعد عن هوسه بلعب الورق والسهرات المشبوهة
عاد الي البيت يترنح.. يخاف ان تراه شهد
اقتربت شهد منه بهدوء.. اخذت بيديه وساعدته علي الوصول لغرفته والنوم حتي لا يراه اطفالها ويفتضح امره
شهد بندم وحسرة : للاسف يا حمزة حبيتك بس مقدرتش اغيرك وعارفة انك بتحبني بس ابويا الله يرحمه قالي.. اللي ميخفش من ربنا خافي منه
مش هستني معاك لحد ما تضيعني وتضيع ولادك

جمعت ما يخصها هي واولادها الثلاث وتركته نائماً وعادت الي موطنها والي حضن والدتها التي ربتها علي ان حدود الله لا تهاون بها
افاق حمزة في الصباح يشعر بصداع قوي وألم يفتك برأسه ليحدث نفسه بملل:
يوووه الحين شهد بتعطيني درس بالأخلاق وتصدعني اكتر ماني مصدع.. اخذ حماما عله يفيق قليلا توجه خارجاً يبحث عنها دون فائدة
حمزة بصوت عالي : ساندرا.. وين مدام شهد
سنادرا : مدام شهد مشي باليل واخد ولاد معاه
حمزة بفزع : شنو يعني مشت وين راحت
ساندرا : هي رجعت بلاد.. راحت مصر

توقف حمزة لا يصدق ما فعلته كان يعتقد انها تهدده.. لم يتوقع انها سوف تبتعد وتتركه
ساعات وكان حمزة بالقاهرة ومنها الي المنصورة..
وصل الي بيت والد شهد.. سمير المصري
دقائق وكان بالمنزل والغضب يعلوه متحدثاً الي شهد بعنف وحدة
حمزة : لو انك متربية ما بتتركي جوزك نايم وتسافري بدون اذنه.. بس انا اتهاونت معاكي كتير
شهد : لو انا مش متربية كنت اتخانقت معاك باليل وسمعت الناس بمشاكلنا بس خلاص انا اكتفيت منك ومبقاش فارق معايا.. انت انسان نمرود بتستغل نعم ربنا في معصيته.. حذرتك كتير ووثقت في وعودك وصدقتك بس خلاص.. انتهينا
حمزة بغرور : كيفك.. خليكي وبترجعي من نفسك بس اولادي باخدهم
شهد : لما يوصلو للسن القانوني بتاخدهم.. دلوقتي هما بحضانتي
حمزة : والله يا شهد لو ما اتعدلتي ورجعتي معايا الحين بكون مطلقك
شهد بخيبة وفقدان للأمل : طلقني ياحمزة.. وياريت تبقي اد كلمتك

الفصل الخامس والعشرون

في الصباح.. مازالت ذكية بفستان زفافها كما هي بالأمس.. تبكي وتخشي أن يصر ماجد علي طلاقها استمعت الي خطواته تقترب.. نظرت اليه تلومه علي ابتعاده عنها بليلة عرسهما فأخفض بصره وهو يشعر بالحزن من اجلها
ماجد بهدوء : قومي غيري فستانك علشان اهلك زمانهم جايين
لم تجيبه بل ظلت مكانها ثم تحدثت اليه :
ملوش لزوم هروح معاهم زي ما انا كده متشغلش نفسك بيا
ماجد : انت اتجننتي.. عاوزة تروحي مع اهلك يوم الصباحية وبالفستان.. الناس تقول عليكي ايه
ذكية : هيقولو معجبتش العريس.. رجع لعقله وعرف انها مش مناسبة ليه.. متخفش هيقولو عليا كل حاجة تتخيلها ومش هيغلطوا فيك
اقترب ماجد منها لكي تهدأ فدفعته بحده وغضب
ذكية : ابعد عني.. مش محتاجة منك شفقه
انا مش هرمي نفسي عليك.. ولو انت مش عاوزني انا مش عوزاك وهمشي حالاً