عتاب عدوية المصري

بينما تجلس جنة وزوجها وعتاب وسميرة يتناولون الافطار
سميرة : انت جبت كيس الكفته يا خالد ولا نسيته
خالد وهو غير مستوعب لسؤال حماته .. ثم ما لبث ان بدأ يضحك بقوة وصوت مرتفع.. نظر الي عتاب قائلاً
ازاي تنسيني الكفته يا عتاب مش كنتي تفكريني
عتاب بابتسامة.. تحولت الي ضحك مستمر.. بعد دقائق تحول ضحكها الي بكاء حاد.. اخذتها جنة باحضانها بينما ظلت والدتها تبكي معها
سميرة : خلاص يا قلبي متعيطيش ربنا يعوض عليكي
عتاب : ياريت يا ماما.. ياريت ربنا زي ما زرع حب سامح في قلبي سنين.. يشيل الحب ده.. يمحيه من حياتي..

خالد بجدية : لو عاوزة تنسي او عالأقل تبدأي تنسي كملي حياتك.. خدي خطوة صح يا عتاب
عتاب : ان شاء الله ده اللي نويت اعمله.. وبعد اذنكم انا عاوزاك تبلغ كابتن ركان موافقتي علي جوازي منه
جنة : بلاش يا عتاب.. اصبري شوية حبيبتي علشان تفكري صح
عتاب ببكاء لم يتوقف : مش عاوزة افكر ياجنة.. هيحصل ايه اكتر من كده.. معتقدش اني هموت مرتين يعني.. خليني ابعد وابدأ من جديد

ركان ببيته بعد ان هاتفه خالد وابلغه بموافقة عتاب عالزواج وطلب تحديد موعد للاتفاق علي التفاصيل ذهب مسرعا لاخبار عائلته
العنود بغضب وهجوم : مستحيل يا ركان ضاقت الدنيا بوجهك ومالقيت غير المصرية.. بنات الديرة بيتمنوا نظرة منك.. مستحيل اوافق
ركان بهدوء : مصرية.. خليجية كلهم واحد.. وياريت ماتنسين اني كنت متجوز من الديرة ومن اهلنا وبالنهاية شنو سوت.. خانتني يا العنود ولا نسيتي
رسمية بهدوء : هدي شوي حبيبي.. الله يسهلها خلاص راحت لحالها.. والبنات كتير اختار اللي تبيها
ركان باصرار : خلصنا يا أمي انا عطيت كلمة وماراح ارجع بكلامي وعتاب لما تتعاملوا معاها اكيد راح تحبوها.. انا بدي ابدأ حياتي واستقر ويكون عندي اولاد واذا بأي وقت حسيت انها اتسببت بمشاكل او ضايقتك بكلمة اكيد انتي واثقة اني ماراح اسكت وما بسمحلها

تجلس ذكية بصحبة ماجد.. فبعد ان طلب يدها من شقيقها بدأت تشعر ناحيته بالأمان فقد اكد لها انه رجل ولن يتخلي عنها بسهولة
ذكية برفض : لا يا ماجد انت كده بتشتغل ليل ونهار غلط عليك
ماجد بمحبة : بالعكس انا سعيد جدا الحمد لله وفي مافاجأة كمان
ذكية : خير يارب
ماجد : انا ورامز هنتشارك ونفتح عيادة اسنان في بلدهم.. البلد عندهم مفيهاش عياده حديثة ومجهزة وباذن الله هتكون اسعارها معقولة
ذكية : بس العياده هتتكلف كتير
ماجد : طبعا بس انا ليا وديعة في البنك ان شاء الله هسحبها وهو اهله هيساعدوه وهنبدأ واحدة واحدة وان شاء الله ربنا يكرمنا.. نساعد الناس ونستفيد.. ونتجوز بقي
ذكية بخجل وتردد : مش هتندم يا ماجد او تسبني في نص الطريق
ماجد : اكيد هندم لو مقدرتش اكمل معاكي.. يمكن انتي مش مقتنعه بحبي ليكي.. بس الحب مش كلام وبس الايام هي اللي هتأكدلك كلامي واني مكتفي بيكي يا كوكي عن الدنيا.. واهلي لما يتعاملو معاكي هيحبوكي وهتشوفي