مع وقف التنفيذ ج٢

ربت فارس على كتفه من الخلف مطمئنا وقال :
– متقلقش ان شاء الله خير ..ثم اشار الى الجميع قائلا:
– تعالوا طيب اقعدوا فى استراحة المستشفى لحد ما تخلص الاشعه
قالت الام بعصبيه:
– استراحه ايه ومين ليه نفس يستريح ودونى عند أوضة الاشعه دى عاوزه أعرف بنتى مالها

أومأ فارس برأسه متفهما وقال محاولا أحتواء الموقف:
– طيب مفيش مشكله تعالوا نستناها هناك

أسرعت الام السير وهى مازالت متشبثة بذراع عزة التى كانت تحث الخطى بجوار أمها ووالدها …أنحنى عمرو على أذن فارس خلفهم وقال بأعتذار:
– متزعلش يا فارس أنت مقدر طبعا الحاله اللى هى فيها

نظر له فارس معاتبا وقال:
– ايه اللى بتقوله يا عمرو ده …طبعا مقدر وفاهم الله يكون فى عونهم

أنتظر الجميع فى الخارج حتى خرج إليهم الطبيب وهو يحمل صور الاشعه
وقد ظهرت على وجهه علامات البشرى وقال:
– متقلقوش يا جماعه الموضوع مش خطير الحمد لله
قال الاب بلهفه:
– يعنى مفيهاش حاجه يا دكتور طمنا الله يخليك

وقف الطبيب امامهم يحاول ان يخفف من وقع كلماته وقال:
– بصوا يا جماعه وقعه زى دى كانت ممكن تأذى العمود الفقرى لكن الحمد لله العمود الفقرى كويس محصلش كسور غير فى الرجل اليمين

ضرت أمها على صدرها وشهقت وهى تقول:
– بنتى رجلها أتكسرت

ربتت عزة على كتفها وهى تكفكف دموعها قائله:
– الحمد لله يا ماما أنها جات على قد كده بيقولك العمود الفقرى كان ممكن يتاذى
تابع الطبيب قائلا:
– أحنا دلوقتى هنحط الجبس ومش أقل من 3أسابيع علشان نشيله
وبعديه كمان هنبدأ فى العلاج الطبيعى برضه مش اقل من شهر

شعر الاب بوهن شديد ووخذ فى صدره ولكنه تماسك وقال بضعف:
– يعنى دلوقتى هى هتتجبس ونروح على البيت ولا ايه
الطبيب: لازم تبات هنا يومين على الاقل وبعدين تاخدوها وتروحوا بالسلامه

خرجت الممرضه تدفع عبير أمامها وما أن رأتها والدتها ملقاه على الترولى وهى مستقيظه حتى أندفعت أليها وأوقفت الممرضه وهى تقول لها بلوعه:
– حمد لله على سلامتك يابنتى ياريتنى ما كنت قلتلك اطلعى هاتى الصندوق من بره

كانت عبير تشعر بالالم فى جميع انحاء جسدها من اثر السقطه التى سقطتها من أعلى السلم
حاولت أن تخرج صوتها متماسك ولكنها لم تنجح بشكل كامل فى ذلك وقالت :
– متقلقيش يا ماما انا كويسه قدر الله وماشاء فعل أدعيلى أنتى بس..