مع وقف التنفيذ ج٢

ابتسم فارس وهو يقول :
اربعين ايه بس يا ماما ..مفيش حاجه فى السنة الصحيحه اسمها اربعين وخميس وسنويه كل ده بدع
أتسعت عيناها وهى تقول:
– ازاى يابنى لا فى طبعا …طب حتى اسأل صاحبك الشيخ بلال
ابتسم فارس مرة أخرى وهو يربط على يد أمه بحنان ويقول:
أنتى تعرفى يا ماما الناس جابت حكاية الاربعين دى منين…؟؟
– منين

– زمان الفراعنه كانوا بيقعدوا يحنطوا الميتين بتوعهم اربعين يوم وفى اليوم الاربعين بيقفلوا عليه وبيفتكروا أن روحه رجعتلوا تانى ودخلت جسمه وهو قام بقى ولبس الدهب بتاعه وكل الاكل اللى سايبينه جانبه اصلا وبعدين بقى روحه تلف على حبايبه واهله فلازم يشوف عزا وحداد والا هيغضب عليهم ويتحول لروح شريرة
قال فارس كلمته الاخيره وضحك بشده ويقول:
– كويس أن مُهرة مش موجوده

وتابع ضحكاته الخافته وهو يردف :
والحكايه بقى دخلت بعد كده فى خرافات والناس نقلوها لبعض جيل ورا جيل لحد ما بقت حاجه عاديه … وميعرفوش أن اصلها كفر والعياذ بالله لان أحنا كمسلمين ديننا بيقول أن الميت بيقوم فى القبر يتحاسب على عمله فى الدنيا مش بيقوم يلبس دهب وياكل ويشرب وروحه تخرج تتفسح شويه

مطت والدته شفتاها وقالت باستغراب:
– والله يابنى ما كنت أعرف بس كويس أنك نبهتنى وعموما يعنى دور كلام أمها فى دماغك كويس وأستخير ربنا

نهض فارس بارهاق وهو يقول:
– حاضر يا ماما ..انا كده ولا كده مستنى رد دنيا لانها لسه متعرفش أمها قالتلى أنها لسه مفتحتهاش فى الموضوع

*******************************************

وضعت عزة سماعة الهاتف فى يأس ونظرات الحزن تطل من عينيها وتفصح عن نفسها ..
جلست والدتها بجوارها وهى تقول :
– مش عاوز يكلمك ليه؟؟
ألتفتت عزة لها متعجبةً وقالت بسرعه:
– هو مين ده يا ماما
– خطيبك
– مين اللى قالك كده يا ماما ده انا لسه كنت … كنت بكلمه أهو
أمسكتها أمها من كتفها ونظرت لعينيها قائله:
– ماهو لو مقولتيش هروح أقول لابوكى وهو بقى يقررك بمعرفته

قالت والدتها هذه الكلمه وهمت بأن تنصرف ولكن عزة أمسكتها من يدها وأنحنت تقبل كفها قائلة برجاء:
– لا يا ماما الله يخليكى بلاش تدخلى بابا فى الحكايه
أعتدلت أمها فى جلستها وهى تقول:
– قولى يا عزة ايه اللى حصل بينكوا ..أصلا اللى جه يدينى العنوان ده مش عمرو اللى احنا نعرفه ده كأنه واحد تانى وانا متأكده أنك عملتى مصيبه