مع وقف التنفيذ ج٢

أبتسمت فى رضا وضغطت أزرار هاتفها قائله وهى عيناها لا تفارق عمرو :
– أبعتيلى البشمهندس صلاح بسرعه

أغلقت الهاتف وهى مازالت تتفحصه بابتسامتها العذبه .. شعر عمرو بالحرج فقال:
– طيب أنا ممكن استنى بره مش عاوز أعطل حضِرتك اكتر من كده

أنتبهت لعلامات الحرج التى ظهرت على ملامحه فعادوت النظر الى ملفه مرة أخرى وهى تغلقه قائلة:
– البشمهندس صلاح هيجى دلوقتى علشان يعرفك طبيعة عملك و يوريك مكتبك ويعرفك على زمايلك فيه…طرق الباب ودخل المهندس صلاح …رجل فى أواخر العقد الخامس من عمره يظهر عليه الوقار والنشاط فى نفس الوقت ..دخل وهو يرمق عمرو بنظرات خاليه من أى تعبير وقال موجهاً حديث لألهام:
-خير يا بشمهندسه
قالت بترفع وهى تشير الى عمرو:
– البشمهندس عمرو مهندس مدنى هيبدأ معانا من النهارده وهيبقى تحت مسؤليتك يا بشمهندس
أومأ براسه لها ثم نظر الى عمر بأبتسامه ودوده قائلاً:
-أهلا بيك يا بشمهندس أتفضل معايا

نهض عمرو شاكراً إياها وتوجه فى سرعه للخارج وكأنه يهرب من وحش نظراتها الملنهمه
دخل حجرة مكتبه بصحبة المهندس صلاح الذى قال :
– إن شاء الله الشغل معانا هيفيدك كويس اوى فى بدايتك يا بشمهندس ..
رفع الزملاء نظرهم إلى القادم الجديد فأشار المهندس صلاح إليه قائلاً:
– البشمهندس عمرو هيبقى معاكوا فى المكتب من النهارده

ثم قام بتعريفهم لديه وهو يشير إليهم قائلا:
– البشمهندس أحمد،البشمهندس نادر

صافح عمرو زملاءه فى ترحاب شديد شعر به مع أحمد ولكنه شعر بعكسه تجاه نادر الذى صافحه ببرود وهو يبتسم له بتهكم ..
لم يوله عمرو اهتمام وجلس خلف مكتبه وهو ينظر له وللكمبيوتر الخاص به بنشوة وسعادة ..كانت هذه هى المرة الاولى التى يشاهد فيها الكمبيوتر خارج أسوار الجامعه فهو لم يكن قد انتشر فى هذا الوقت ليصل للجميع بعد……

*****************************************

هتفت أم يحيى بصوت اشبه للبكاء قائلة بلوعة:
-أنا خايفه على البت يا ست أم فارس ..أنا حاسه كده أن مخها متأخر عن سنها ..مش زى زمايلها فى المدرسه ابدا

نظرت لها أم فارس بدهشة كبيرة وقالت :
– ما تصلى على النبى كده يا أم يحيى إيه الكلام اللى بتقوليه ده..مُهره ذكيه وكنت بشوفها وفارس بيذاكرلها بتجاوب لهلوبه
تكلمت أم يحيى بحنق شديد وقالت بإنفعال:
-أومال ليه كل ما اقعد أقولها سمعى ولا حلى وأخوها يسألها سؤال مبترضاش تجاوب ..وغير كده البت زى ما تكون عبيطه كده وشعنونه مش عارفلها حاجه