مع وقف التنفيذ ج٢

قطبت والدته جبينها وهى تقول بأهتمام :
– بس يابنى اللى قاعدين قدام المحكمه دول علشان يشهدوا زور فى كل قضيه
مش المفروض يكون القاضى عارفهم أنهم شهود زور وحافظ شكلهم

أبتسم فارس وهو يقول:
– طبعا يا ماما القضاه حافظينهم دول داخلين خارجين عليهم كل يوم
قالت باستنكار :
– طب ليه القاضى مايحبسهومش طالما عارفهم
– يا ماما فى قضاه بيعملوا كده فعلا بس دول قليلين أوى لكن الاغلب بيمشى القضيه عادى
وفى نفسه بيقول وانا مالى مدام الاوراق مظبوطه قدامى

وضعت يدها على صدرها ثم قالت:
– بس ده يابنى حالف اليمين انه يبقى حقانى
قال فارس منفعلا:
– يا ماما ماهو الدكتور بيبقى حالف اليمين ورغم كده يعنى مبتسمعيش عن دكتور بيغتصب مريضه
ولا دكتور بيصور مريضه ويساومها ولا دكتور بيسرق كلية مريض تحت ايده فى العمليات

القاضى فى الاخر بشر والقضاء مهنه زى اى مهنه فى الدنيا فيها الكويس وفيها الوحش

*******************************************

صلى فارس الجمعة ووقف يبحث بعينيه عن الشيخ بلال وأخيرا وجده فاقبل عليه مسرعاً وصافحه بحراره فقال بلال:
– هو انا يابنى مش هشوفك غير فى المصايب ولا أيه
ضحك فارس لدعابته وقال مدافعاً:
– لا والله مفيش مصيبه المره دى .. دى خدمه بس
ضحك بلال وقال:
– أنا برضه بقول عليك بتاع مصلحتك..ها خير
– شوف يا سيدى الحكاية بأختصار ..أخت خطيبة عمرو صاحبى وقعت من على السلم ورجلها أتكسرت
والدكتور قال لازم علاج طبيعى بعد ما تفك الجبس وأهى فكته من يومين ومن ساعتها وأحنا دايخين على دكتورة ست .. مش لاقين التخصص ده ستات خالص وبما أنك بقى دكتور علاج طبيعى يبقى مفيش قدامنا غير سيادتك

حاول بلال أن يتكلم رافضاً ولكن فارس قاطعه بسرعه :
أولا انا عارف أنك ملكش فى علاج الستات وبتتعامل مع الرجاله بس ..لكن والله غصب عننا ومفيش حل تانى يا أما ست يا أما دكتور نضمن خلقه وامانته
ثانيا انا عارف أنك شهم ومش هترضى نوديها عند أى دكتور منضمنوش
ده غير أنها رافضه تروح لدكتور لانها منتقبه ومش عاوزه راجل يلمسها يرضيك بقى يحصلها مشكله فى رجلها

أطرق بلال برأسه قليلا ليفكر فى الامر لقد كان الامر شبه مستحيل بالنسبة له أن يتعامل مع النساء
وخصوصا فى هذا المجال الذى يتطلب بعض اللمسات المباشرة ..فرفع راسه وقال متسائلا:
– قلتلى أنها رافضه تروح لدكتور راجل ؟؟
– أه والله يا بلال ده حتى لما رجلها أتكسرت وراحت المستشفى بدل ما تعيط من الالم كانت بتعيط أن راجل شاف وشها
وصممت ان والدها يدخل معاها عند الدكتور علشان يجبسها وكل اللى كان مضايقها انه هيلمس رجلها