مع وقف التنفيذ ج٢

********************************************

ومرت الأيام الخمس ووقف فارس يرتدى سترته الانيقة السوداء امام المرآة وهو يستعد لحفل زفافه .. لم يكن متحمساً كما كان يظن فى ذلك اليوم .. مشط شعره فى عناية شديدة ووقف ينظر للمرآة ويتمم على أناقته حينها سمع صوت بلال وعمرو فى الخارج ابتسم وهو يفتح باب غرفته وسمع عمرو يصيح بمرح:
– وأنا هاخد وقت فى اللبس ليه انا حلو من غير حاجه
خرج فارس ورد عليه قائلاً:
– ده ايه التواضع ده كله
ضحك بلال وهو يضرب على كتف فارس قائلاً:
– انتم اللاحقون ونحن السابقون
نظر بلال إلى فارس وقال متسائلاً:
– أنتوا مسافرين بعد الفرح فعلا يا فارس
أومأ فارس براسه وقال:
– أيوا الدكتور حمدى عزمنا نقضى اسبوع فى شقته اللى فى اسكندرية ..هنقضى ساعه كده فى الفرح ونسافر على طول

وضع عمرو يديه فى خصره وهو يتصنع الحقد وقال:
– ماشيه معاك يا عم مين قدك
– بقولك ايه يا عمرو مابدل الحقد اللى مالى قلبك ده يومين تلاته كده وتعالوا قضوا معانا يومين فى اسكندرية
حك عمرو رأسه وهو يقول:
– ممم هفكر واخد رأى الحكومه
ضحك ثلاثتهم بينما قال عمرو :
– يالا يا سيدنا العرايس فى الكوافير مستنينا على نااااااار
نظر فارس حوله وهو يقول متسائلاً:
– هى ماما راحت فين

قال بلال وهو يضع يديه فى جيب بنطاله:
– طلعت تودى الولاد عند مُهرة ونازله على طول ان شاء الله
عقد فارس بين حاجبيه وقال متسائلاً بقلق:
– ليه هما مش جايين معانا
جذبه عمرو من ذراعه وهو يتجه به صوب باب الشقة ويقول :
– ياعمنا يالا بقى هنستناهم تحت الستات دول يومهم بسنه

خرج ثلاثتهم وأغلق فارس الباب خلفة ونزل الدرج خلفهم فى توتر وقلق وهو ينظر للأعلى
ثم ينظر امامه ويكمل طريقة فى الهبوط وقف الجميع اسفل بنايتهم وتبادلوا العناق والتهنئة مع الجيران والاحبة والمدعوين منهم للحفل …
تأخرت والدته قليلاً فقال عمرو:
– ما تطلع تشوف الحاجه يا فارس عزه عماله تتصل شكلنا بقى وحش أوى

نظر فارس الى هاتفه فوجد مكالمتين من دنيا لم ينتبه إليهم..كان على وشك أن يهاتفها ليخبرها أنهم فى طريقهم ولكنه وجد يحيى يهبط الدرج بسرعة ويتجه إلى بلال مباشرة وهو يقول:
– لو سمحت يا دكتور ممكن تطلع معانا اصل مُهرة تعبانه اوى