مع وقف التنفيذ ج٢

قال بلال بعفويه :
– هى منتقبه من زمان ؟

نظر له فارس بدهشة وقال:
– افتكرتك هتسألنى على حالتها الصحيه
أنتبه بلال لسؤاله وقال مستدركاً:
– طب ماهى هترفض تجيلى برضه مش بتقول رافضه تروح لدكتور راجل
أبتسم وهو يقول:
– لو وافقت هقول لباباها وهو هيتصرف ..وبعدين لما هتعرف أنك ملتزم أكيد هتوافق مفيش قدامها حل تانى
ماهو الدكتور خوفها بعد ما فك الجبس وقالها لو معملتيش علاج طبيعى هيحصل تيبس للعضلات وضمور ومش هتعرفى تتحركى تانى

قطب بلال جبينه وهو يعقد ذراعيه امام صدره قائلا:
– قصدك يعنى ان انا اقل الضررين
وضع فارس يده على ذراعه قائلا بنفس الطريقه :
– بالظبط كده يا دكتور
أبتسم بلال قائلا:
– هاتهالى المركز بكره ..بس يكون والدها معاها

الفصل الثالث عشر
———————

كانت عزة تجلس بجوار أختها عبير صباحا وهى تساعدها فى ارتداء أسدال الصلاة فسمعت صوت رنين الهاتف فقالت عبير:
– روحى شوفى مين يا عزة خلاص هلف الطرحه واصلى…

تركتها عزة وأتجهت للهاتف وأجابت على المتصل:
– السلام عليكم
أبتسم عمرو بتلقائيه وهو يقول:
– وعليكم السلام .. هى النمره غلط ولا ايه
قالت عزة باستغراب:
– لا يا عمرو النمره مش غلط انا عزة

أتسعت ابتسامته أكثر وأخفض صوته وهو يضع اصابعه على سماعة الهاتف قائلا :
– لما رديتى عليا وسمعت صوتك افتكرت انى أتصلت بمحل العصافير

أنتبهت عزة أنه يداعبها فلم تستطع أن تمنع نفسها من الابتسام ولكنها قالت بنرة جديه:
– خير يا عمرو فى حاجه

زفر عمرو بقوة شعرت بها عزة على الطرف الاخر وقال:
– أه فى طبعا أومال بتصل علشان أقولك وحشتينى مثلا لا يا ماما ده بُعدك

أحمرت وجنتها وقالت بنبرة اكثر جديه:
– لو سمحت يا عمرو قول عاوز ايه والا هنادى ماما تكلمك هى بقى
قال بسرعه :
– لالالا على ايه يا ستى .. بصى احنا الحمد لله لقينا دكتور علاج طبيعى كويس أوى ومحترم جدا ومتدين وعلى فكره هو مش بيتعامل مع ستات بس لما فارس قاله ان عبير مش عاوزه تروح لدكتور والكلام ده وافق طبعا بس عاوز والدك يروح معاها

قالت عزة بتلقائيه وبدون تفكير:
– معرفتك ولا معرفة فارس
تغير صوت عمرو وقال بضيق:
– هتفرق معاكى مش كده ..؟؟

شعرت بالارتباك وندمت على كلمتها ولكنها قالت بتماسك :
– لا مش قصدى ..قصدى يعنى اصلك بتقول متدين و…محتــ….قاطعها بغضب وغيرة واضحه:
– وأنا معرفش حد متدين ومحترم لكن فارس يعرف مش كده مش ده قصدك..
حاولت ان تتكلم ولكنه قاطعها مرة أخرى قائلا:
– عموما هكلم والدك لما أرجع من الشغل وأديله التفاصيل والعنوان..سلام