مع وقف التنفيذ ج٢

جلس والداها على المقعدين المقابلين امام مكتبه وهو ينظر إلى الاشعه بإمعان وتأمل دقيق..
ثم رفع راسه بابتسامه عذبة وبشاشة قائلا:
– ماشاء الله نتيجة الاشعه ممتازة ..بإذن الله كده الموضوع مش صعب خالص على فكره … متقلقوش يا جماعه

قالت والدتها وقد لانت تعابير وجهها قليلا:
– ان شاالله تسلم يا دكتور والله أنت وشك فيه القبول
أردف زوجها بسرعه :
– اه والله يا حاجه معاكى حق
ابتسم بلال وهو ينظر للزوج قائلا:
– جزاكم الله خيرا والله ده من ذوقكم بس .. تناول أحد الملفات الفارغه وهو يقول:
– انا هعملها ملف بحالتها فى الاول كده علشان نبقى متابعين التطورات اول بأول

لمعت فى عينيه بنظرة ذات مغزى وهو يدون البيانات ..
تظاهر بالاستغراق فى كتابة البيانات ووالدها يمليه اسمها والعنوان ورقم التليفون
توقف فجأه عن الكتابه وسأل بشىء من اللامبالاة قائلا:
– أكتب انسه عبير ولا مدام عبير
قالت والدتها سريعاً:
-انسه عبير يا دكتور
دون بلال البيانات فقال والدها:
– هو العلاج الطبيعى ده بيبقى ازاى .. معلش يا دكتور اصلها بصراحه قلقانه أوى
ومكنتش عاوزه تيجى علشان يعنى مش عاوزه حد يشوفها

قال بلال وهو ينهض ويتجه إليها قائلا:
– متقلقش يا حاج وتناول مقعد صغير ووضعه بجوار مقعد الكشف الذى تجلس عليه
وما أن جلس عليه امامها مباشرة وما أن شعرت عبير باقترابه حتى هتفت فجأه:
– مش هكشف .. مش هكشف انا عاوزه امشى .. روحنى يا بابا

هب والدها واقفاً واقترب منها يهدأها بينما قال بلال له:
– لو سمحت يا حاج استنى حضرتك شويه .. عاوز أتكلم مع الانسه عبير

أومأ والدها برأسه موافقاً له فأستند بلال بمرفقيه على قدميه وقال لها دون أن ينظر إليها:
– انسه عبير لو سمحتى أهدى علشان أعرف افهمك طبيعة العلاج …غشيت الدموع عينيها ولم ترد شعر بالشفقه تجاهها وهو يرى دموعها تنساب من عينيها لتبلل غطاء وجهها وقالت بصوت متقطع:
– أنا عندى أموت ومفيش راجل يلمسنى
قال بجديه :
– يعنى أنتى عمرك ما روحتى لدكتور خالص

قالت بأنفعال الحمد لله عمرى ما تعبت الا ولقيت دكتوره ست الا المره دى
– اه بس ليه تتكسفى من الدكتور ده شغله يعنى مش أى راجل كده وخلاص
قالت بصوت متقطع من اثر البكاء:
– السيده عائشه كانت بتشد ملابسها عليها وهى داخله الحجره اللى ادفن فيها الرسول عليه الصلاة والسلام علشان عمر بن الخطاب كان مدفون جنبه.. يعنى كانت بتستحى من واحد ميت حضرتك بقى مش عاوزنى استحى من راجل عايش لمجرد أنه دكتور