مع وقف التنفيذ ج٢

وقفت دنيا متربصة فى صمت وبعينين زائغتين تنتظر حديث أمها التى يظهر من بدايته أنه غير مبشر على الإطلاق .. فتابعت والدتها بحسم :
– أنا أتكلمت مع فارس وأتفقنا على كتب الكتاب قريب أوى وهو وافق بس مستنى رأيك
أتسعت عينيى دنيا دهشة وهتفت بأستنكار:
– بتقولى ايه يا ماما

هبت أمها من مجلسها وتقدمت منها وجذبتها من يدها بعنف وابعدتها عن الباب أتجهت بها إلى الفراش ولفتها إليها وأمسكتها من ذراعيها ونظرت إليها نظرات مخترقة وهى تقول بغضب:
– أسمعى يا بت أنتى أقسم برب العزه لو قلتى لاء ولا فتحتى بؤك بكلمه لكون بعتاكى مع عمتك على البلد وهتقعدى هناك ومش هترجعى هنا تانى وهناك بقى يا عين أمك يبقوا يجوزوكى بمعرفتهم

بكت دنيا بين يدى أمها وهى تتضرع لها قائلة:
– ليه كده يا ماما هو انا عملت ايه علشان كل ده

دفعتها أمها على الفراش وقالت بحزم:
– أنا مش هسيبك لما عيارك يفلت وتعتمدى على أنك ابوكى خلاص مبقاش موجود وسطينا
دفنت دنيا وجهها فى الفراش وهى تبكى بحرقة وتقول بصوت مختنق:
– يا ماما والله ما عملت حاجه الراجل ده كان بيعرض عليا الجواز وأنا رفضت والموضوع أنتهى
– هو انتى يا بت مش كنتى بتقولى أنك بتحبى خطيبك .. مش عاوزه تجوزيه ليه ..هه فهمينى

مسحت دنيا دموعها بكفيها وهى تقول بصوت متقطع:
– يا ماما والله عاوزه أتجوزه بس مش عاوزه أعيش فى الحاره مع أمه
– خلاص بسيطه نكتب الكتاب لحد ما نلاقى شقه ايجار كويسه تعيشوا فيها واهو مرتبه زاد كتير بعد ما أترقى فى المكتب
قالت دنيا بحنق وهى تجفف دمعها:
– ايجار يا ماما ..أنتى عمرك ما وافقتى على الاقتراح ده قبل كده

نظرت والدتها أمامها وقالت بوجوم:
– كنت غلطانه ..كل حاجه كانت غلط ..لكن دلوقتى خلاص مينفعش أغلط تانى …أبوكى سابك امانه فى رقبتى وانا مش هخزله ابدا وافرط فيكى واسيبك تضيعى وتضيعينا معاكى
ثم ألتفتت إليها وقالت محذرة:
– أمه هتيجى تعزينا النهارده وهو هيسألك عن رأيك وطبعا أنتى موافقة ..مش كده ولا ايه
قالت دنيا باستسلام :
– حاضر يا ماما هوافق

نهضت أمها واقفة وهى تلقى نظرة على صور أبيها وتقول بشرود:
– ابوكى كان بيقول على فارس راجل وقد المسؤليه ..يارب بس يقدر يستحمل بلاويكى
وأعملى حسابك أنتى مش هتخرجى من البيت قبل كتب الكتاب فاهمه ولا لاء
– فاهمه