كيف اعيش معك ج٣

لمار مشاكسه : واحد كده شربنى عصير فراوله وانا عندى حساسيه منها

أسامه : بجد ! طب مقولتيش ليه يا لمار

لمار : عادى حصل خير

سهام : لمار مش يلا بينا عشان انا كده هتأخر ؟

أسامه : بسرعه كده انتوا حتى مشربتوش حاجه

لمار : معلش عشان اتأخرنا تحب اجبلك الدوا ؟

أسامه : لا خلاص صاحبى زمانه جاى

قالت له سهام بنبره سخريه : الف سلامه عليك يا أستاذ أسامه

أسامه بحده خفيفه : الله يسلمك يا دكتوره

خرجت سهام اولا وورائها لمار ولكن اوقفها أسامه قائلا بصوت منخفض : هتوحشينى على فكره

احمرت وجنتا لمار وابتسمت له : هكلمك لما اروح

نزلوا الى السائق الذى كان ينتظرهم ركبوا السياره
أشارت له لمار ان يتجه الى الفيلا ثانيه

اعترضت سهام : لا انا لازم اروح عشان متأخرش اكتر من كده

لمار : ياسلام مش كنتى جايه تقعدى معايا

سهام : اه وكمان دكتور ممدوح اللى خرجنى من الشغل مخصوص عشانك بس انتى بعتينى بقى وانا كده هتاخر على ماما

لمار بترجى : عشان خاطرى ياسهام تعالى شويه وانا هروحك للبيت وبعدين والله كان غصب عنى

سهام بتصميم : معلش خليها مره تانيه عشان خاطرى

لمار باستسلام : حاضر

واعطت العنوان للسائق

نظرت لها سهام قليلا وترددت فى قولها ولكنها تشجعت وقالت : انتى مصدقه انه تعبان !

لمار باستغراب : قصدك ايه !

سهام : قصدى انه مش تعبان وكان بيمثل عليكى يا لمار

لمار باستنكار : انتى بتقولى ايه ياسهام لا طبعا

سهام بغيظ : لا طبعا ايه يا بنتى اومال لو مكنتيش دكتوره وفاهمه شغلك بذمتك دا واحد تعبان ؟ دا حتى الحراره طبيعيه مش زى ما قالك فى الموبايل

لمار مدافعه : ما هو قالك يا سهام اخد دش ساقع

سهام : وهو لو تعبان وبرد فى العضم زى ما بيقول هيستحمل يحط ميه بارده على جسمه !

لمار : قصدك ايه

سهام : قصدى انك هبله ومضحوك عليكى ومش عارفه دماغك فين

لمار بصدمه : يعنى أسامه بيضحك عليا !

سهام : ايوه بيضحك عليكى

لمار : طب ليه ؟ ايه مصلحته

سهام بتفكير : اهو دا اللى معرفوش بس قوليلى واحد مثل انه تعبان وعارف ان فيه بنت جياله وهو لوحده فى شقته يبقى ايه !

لمار باستنكار : لا ياسهام اكيد انتى فاهمه غلط

سهام : لا ملهاش حل غير كده

لمار : ” ان بعض الظن اثم ”

سهام بتنهيده : ونعم بالله ياحبيبتى انا مش قصدى حاجه كل الموضوع انى خايفه عليكى وانتى طيبه وعلى نياتك