كيف اعيش معك ج٣

خرج ممدوح من الغرفه وقالت الداده : انا هقوم اشوف الاكل هيجى امتى

عمر بسرعه : اكل ايه لا انا مش عايز

الداده : مش عايز ايه مينفعش لازم تعوض الدم اللى نزل دا

عمر : مش دلوقتى يا داده هستنى لمار لما تصحى

دخل ممدوح الى الغرفه ثانيه قائلا : خلاص انا بلغت وشويه وهيبعتلونا حد يسجل المحضر

عمر : هو انا هفضل هنا كتير انا عايز امشى

ممدوح : هنستنى لحد ما الظابط يجى وهنقلك المستشفى عندى

عمر : لا لا انا عايز ارجع البيت مبحبش المستشفيات انا

ممدوح بضيق : اهو جينات العيله هتشتغل وهيقولى زى مراتى عايز اروح

عمر ضاحكا : ايه يا اخى مش عايز تريحنى حتى وانا تعبان

ممدوح : مليش دعوه لما مراتك تقوم تشوفلها حل معاك

سلمى : انا هروح اصحيها عشان وعدتها انك اول ما تفوق هخليها تشوفك

الداده : وانا هروح اشوف الاكل

عمر ناظرا ليده : انا ايدى باظت ينفع كده دى منظر خياطه

ممدوح ضاحكا : احمد ربنا دى مستشفى خاصه اومال لو وقعت فى حكومى

عمر : طب هى هتفضل كده ولا الجلد هيرجع تانى

ممدوح : لما نفك الخياطه هنشوف لو الجلد مرجعش طبيعى هبقى اعملك عميله تجميل صغيره

عمر : طب ايه اللى انتوا ملبسهونى دا حاسس انى اهبل

ممدوح ضاحكا : لبس المستشفى

عمر : انا مصدع جدا

ممدوح : معلش من الخبطه بس الحمد لله ان مصحلش اى حاجه للمخ

عمر : الحمد لله بقولك ايه …

قطع حديثهم صوت طرقات خفيفه على باب الغرفه وبعدها دخلت سلمى ومعها لمار .. ازدادت دقات قلبه عند رؤيتها ملابسها متسخه بها بعض الثقوب وجهها به بعض الكدمات
واللاصقات الطبيه عقد حاجبيه عندما رأى شعرها ينسدل على ظهرها ..

غمز ممدوح بعينيه لسلمى تفهمت وخرجوا سويا ليتركا الزوجان وحدهما ..

ابتسمت له لمار واقتربت منه قائله : حمد الله على سلامتك

عمر بضيق : الله يسلمك

بهتت لمار من رد فعله اكمل عمر حديثه قائلا : لمار تعالى اقعدى جنبى

أومأت لمار برأسها وجلست بجواره على الفراش مد عمر يده وملس على شعرها وقال بهدوء : لمار فين حجابك ؟!

انتفضت لمار ووضعت يدها على رأسها بسرعه وقالت باستغراب : ايه دا ؟ مش عارفه

عمر بنفس الهدوء : محستيش انك مش لابسه طرحه ؟

لمار : والله لا ماخدتش بالى

عمر بابتسامه : معلش تلاقيكى عشان مش متعوده

زفرت لمار بضيق : عمر بجد انت غريب دا وقته تركز فيه ف شعرى ولا حجاب انت ف ايه ولا ف ايه