كيف اعيش معك ج٣
بقلم حسناء محمود
ولكن كيف ومتى ينفذها !
الحلقــة الــعـشــرون ♥
صعدت سلمى الى غرفتها ووجدت ممدوح جالسا على فراشهم .. جلست بجواره وتنهدت بصوت مسموع
التفت لها ممدوح مستفهما : عملتى ايه ؟
سلمى : مش موافقه
ممدوح : على مين فيهم ؟
سلمى : الاتنين
ممدوح برضا : كنت متوقع كده برده
سلمى : أكدت عليها انها لازم تكلم طنط ألفت
ممدوح : و وافقت ؟
سلمى : اه
ممدوح ممازحا : خلاص ربنا معاكوا
سلمى : اه دبستنى انت معاها واكيد هسمع كلام ملوش لازمه
ممدوح : معلش عشان نخلص بقى
سلمى : بس مش غريب موضوع شهاب دا ؟
ممدوح : هو غريب بعقل انا مش فاهمها بصراحه فى ايه مش طايقينها وفى ايه عايزينها لشهاب
سلمى : انا مش مرتاحه بس تفتكر عمر هيعمل ايه ؟
ممدوح : مش عارف بس انا متأكد انه هيتصرف
سلمى : انا مش فاهمه ليه ميروحش يقولها انه بيحبها وعايز يتجوزها ونخلص كلنا
ضحك ممدوح : ياسلام هى الدنيا سهله كده ؟
سلمى : وليه متبقاش سهله مصعبها على نفسه ليه ؟
ممدوح مفكرا : مش عارف بس اكيد عمر له اسبابه
سلمى بشك : انا شاكه ان فى حاجه بين لمار وأسامه وعمر عارف عشان كده متردد
ممدوح متفاجئا : لمار وأسامه ! مش غريبه دى ؟
سلمى : لا انا لاحظت كذا مره انهم بيخرجوا مع بعض ومره جبت سيرته وسألتها عنه اتلخبطت كده
ممدوح : بس مش معنى كده يكون فيه حاجه
سلمى : مش عارفه بس مش مطمنه ولمار مش راسيه معايا على بر
ممدوح : قصدك ايه ؟
قصت له سلمى ما حدث عندما اخبرت لمار عن شهاب وسؤالها عن عمر تحديدا
ممدوح : عادى يمكن عايزه تعرف رأيه
سلمى : يمكن او يمكن بتحبه !
ممدوح : انا دماغى وجعتنى
سلمى ضاحكه : انا مبعرفش اتكلم معاك ابدا
ممدوح : منا دماغى فيها 50 حاجه يا سلمى ومش فايق للمسلسل التركى اللى احنا عايشين فيه دا ثم غمز لها : مفيش احسن مننا حبينا بعض واتجوزنا وخلصنا المسائل
سلمى مشاكسه : لا بس السسبينس حلو مفيش كلام
ممدوح : بمناسبه السسبينس والاكشن فين الاستاذ أسر
سلمى : كويس انك لسه فاكر تسأل عليه
ممدوح : هو انا لحقت ؟ عملتى فى الواد ايه انطقى بسرعه فين ابنى
سلمى : سبته مع الداده
ممدوح بفرحه : يااه هنام اخيرا من غير صداع ومش هتفضلى تسكتى فيه
مطت سلمى شفتيها قائله : مش بقولك ضرتك ؟ نام نام تصبح ع خير هقوم انا
امسك ممدوح بذراعها : راحه فين ياحبيبتى
سلمى : هسيبك تنام من غير صداع
