كيف اعيش معك ج٣

أسامه : ادينى هديت

على : خلاص موضوع وخلص وراح لحاله انا مستغرب جدا ان عمر يعمل فيها حاجه زى كده من امتى يعنى

أسامه بغيظ : بيردلى القلم اللى خده من خطيبته

على : خلاص مضايق ليه واحده قصاد واحده

أسامه : بس مش انا اللى يتعمل فيا كده

على : يعنى هتكمل معاها ؟

أسامه باستنكار : لا طبعا بقت كسر دلوقتى

على : اومال هتعمل ايه !

أسامه : هقف اتفرج عليهم ولما يجى دورى هتدخل !

———————————————————————————–

لمار : تفتكرى هيوافق ؟

سهام : مفيش حاجه اسمها هيوافق دا يبقى شرطك لو مقبلش يبقى ارفضى

لمار بتفكير : عندك حق

ربتت سهام على كتفها : ربنا يحلها من عنده

لمار بحزن : يارب عشان انا تعبت كل ما افوق من صدمه ادخل فى التانيه

سهام : قومى يلا نروح على بيت عندنا خليكى عندى انهارده وروحى بكره

لمار : مش هينفع اكيد هيشكوا ان فى حاجه وانا مش عايزه مخلوق يعرف مش عايزه اتفضح ياسهام

سهام : بعيد الشر عنك

ضحكت لمار بسخريه : وهيبقى فى شر اكتر من اللى انا فيه

سهام : وعسى ان تكرهوا شيئا

لمار : ونعم بالله خلاص يلا بينا اوصلك واروح انا عشان مصدعه وه*م*و*ت وانام

سهام ماشى يلا بينا

اوصلت لمار سهام بالسياره ثم توجههت مره اخرى الى الفيلا .. وجدت الداده جالسه على مقعد فى بهو الفيلا ..
عندما رأتها وقفت لها مبتسمه .. توجهت لمار اليها واحتضنتها ..

الداده : تصدقى وحشتينى اليوم دا كده مش هنعرف نعيش من غيرك

دق قلب لمار بعد جمله الداده فلقد لمست فيها ما كانت تخشاه لمار .. ابتسمت لها قائله : ولا انا اقدر اعيش من غيركوا

الداده : مالك يابنتى عينيكى حمرا كده انتى معيطى ؟

لمار بسرعه : لا ابدا يا داده منمتش كويس بس ومصدعه محتاجه انام

الداده : طب اكلتى ولا اعملك اكل ؟

لمار : لا اكلت هى سلمى فين ؟

الداده : فوق بترضع أسر

لمار : طيب انا هطلع انام ياداده معلش ميته من التعب

الداده : طب خلاص هصحيكى على الغدا

لمار : لا اكلت صحينى على بليل كده

الداده باستسلام : ماشى يابنتى اللى يريحك

صعدت لمار الى غرفتها والتى باتت سجن لها .. فرق يوم فقط على حبها الشديد وكرهها الشديد لهذا المكان ..
بدلت ملابسها وتوضأت وصلت ودعت الله ان يرشدها الى الطريق الصحيح .. ثم ذهبت الى فراشها وحاولت النوم علها تجد فيه بعض الراحه …