(أشباح المخابرات1) من الفصل الحادي عشر الى الخامس عشر

أنا مزيج ما بين #الجوكر_والاسطورة… #الشبح_زين_زيدان..

أنا الذي نبع عشقك في قلبي منذ الطفولة، وتعاهد بأن يجمع الحب بيننا حتى الرمق الاخير، أنا ذاك الذي يقسو في ساحة المعركة وأمامك يصبح مطيعًا وكأنه يحمل روحين في جسده، حينما يحتل الشبح القيادة ينهي من حوله بصدر رحب، وحينما يحتل العاشق الذي إلتاع قلبه عشقًا لكِ يصبح رجلًا لا أعرفه ولكني أعلم بأنه سيخسر أي معركة أمام رقتك ونقاء قلبك.

وصال الحب ينتقل عبر نظراتهما، لا تصدق أنها تجلس رفقته، على أعلى شلال المياه وبين الاشجار الخلابة، رغم أنها تخشى الاصوات المرعبة المنتشرة بالغابة الا أنها كانت تأنس بوجوده، تعلم بأنه قادر على حمايتها حتى من نفسه.

سحبت عينيها من لقاء زيتونته المهلكة ورددت:
_وبعدين يا زين، بقالنا تلات ساعات قاعدين كده، أنا خايفة زمايلي يقلقوا عليا.

منحها ابتسامة جذابة وقال:
_متقلقيش أنا بلغت المشرفة إنك بتزوري حد من قرايبك وهترجعي بليل، ولو على عمي فأعتقد انك سمعتيه وهو بيتأكد منك إنك قابلتي السواق يعني على علم بكل حاجة.

مالت تتطلع له ببسمة ساخرة:
_أيوه ده انت مرتب كل حاجة بقى.

سند يده على يدها المسنودة لجواره:
_رتبت كل حاجة عشان أقضي معاكِ اليوم كله، أنا بخطف اللحظات عشان أجمع كام ذكرى تجمعنا مع بعض.

سحبت كفها وحذرته بضيق:
_زين أنا مش بحب كده وإنت عارف، من فضلك متزعلنيش منك.

لف وجهه للامام وهو يتنهد بغضبٍ، جعلها تنزعج مما تفوهت به، فتحدثت له بنبرتها الهادئة:
_مش قصدي أضايقك بس أنا مش بكون مرتاحة لو حصل بينا تجاوزات، بتمنى تحترم ده.

ضم شفتيه بعنف، وصاح مستنكرًا:
_هي مسكة الايد تجاوزات!! وبعدين ما أنا اتزفت عرضت على سيادتك وعلى عمي نكتب الكتاب اكتر من مرة وانتوا رافضين ده أعمل أيه يعني!!!

تصنعت الحزن من طريقة حديثه، فسحب نفسًا طويلًا ثم استدار صوبها:
_متزعليش أنا آسف..

وأضاف وهو يعود لابتسامته:
_أنا مش حابب يكون بينا خلافات في الكام ساعة دول.

ومال بجسده وهو يستند بساقيه على الصخرة من أسفله:
_طمنيني شجن عاملة أيه، وحشتني أوي؟

مالت تجاهه تخبره بحماس:
_كل شوية بتسأل طنط أشجان وأنكل رحيم عنك، وزعلانه جدًا، يا ريت يا زين تحاول تكلمها قبل امتحاناتها

وتابعت بحزن شديد:
_إنتوا شغلكم فارض علينا إننا منعرفش نتواصل معاكم الا لما تقرروا تكلمونا، أنا كمان مرين وحشتني أوي ونفسي أسمع صوتها، أنا مش متخيلة اني مشفتهاش طول الفترة دي.