(أشباح المخابرات1) من الفصل الحادي عشر الى الخامس عشر
بقلم أية محمد رفعت
حلت عقدة يدها وجلست على المقعد المقابل له:
_طيب رجعت هنا ليه، ما كده ممكن يشكوا فيك!
ابتسم وهو يخبرها:
_متقلقيش الدوبلير اللي أخد مكاني بيأدي دوري بامتياز، بينور الاضاءة كل يوم في الشقة وبيطفيها وقت نومه، وبيخرج يشرب قهوة كمان بعد الظهر في البلكونة..
وضحك برجولية وهو يمازحها:
_رحيم زيدان مبيفوتش حاجة.
قرب منها كوب العصير، فهزت رأسها بنفي، جعله يستقيم بقامته وهو يعود للبراد:
_آسف نسيت.
عاد بعد قليل يحمل العصير الخاص بها، ابتسمت وتراجعت عن الرخامة حتى وضعه أمامها، فهمست على استحياء:
_ميرسي.
هز رأسه بايماءة بسيطة، وعاد إلى محله، عبثت مرين بالكوب من أمامها وعقلها يجوب داخله معركة مريبة، لفظتها بقولها الذي جعلته عاديًا:
_قولت انه رمى في طريقك واحدة تسكن قدام الشقة اللي المفروض بتاعتك!
لاح على شفتيه بسمة خبيثة، فقال وهو يتناول بعض الشطائر:
_الحقير ده أسرع مما تخيلنا، في لحظة ما وصله صوري ما تيام عمل بحث شامل عني، وطبعًا موصلش غير للي أحنا عايزينه يعرفه، على طول خلى واحدة من اياهم تأجر الشقة اللي قدامي، وأنا طالع العمارة عشان أوهم اللي بيراقبني إني رجعت شقتي عادي، لاقيتها في الاسانسير، وحاولت تشد معايا كلام، وأخرهم إنها اتكعبلت في شنطها اللي معاها واترمت عليا بأسلوب قذر، فساعدتها لحد ما وصلت لشقتها وأوهمتها هي والكلب ده إنها عاجبتني!
وأضاف باسلوب مستهزأ بينما تدرس عينيه الغيرة البادية بين زُرقتها:
_وبقيت السيناريو أكيد مكشوف، هتفضل ورايا لحد ما تحاول توقعني عشان تعرف طبيعة علاقتي بتيام واللي واصلني عنه وعنهم، مسكين هارون ده!!!
رسم البراءة وهو يتطلع للكوب:
_أيه العصير مش عاجبك؟
هزت رأسها بالنفي وارتشفت منه قائلة:
_بالعكس جميل.
ارتشفت منه، ثم تساءلت وهي تبعد خصلات شعرها للخلف:
_زين فين مختفي من امبارح؟!
تجرع كوبه ببطء وقال بمماطلة:
_إنتِ عارفة إنه زي الشبح بيظهر وبيختفي فجأة.
تعمقت بعسليته بنظرة مستهزئة، فابتسم وقال:
_بلاش نظرة المخابرات دي معايا، مجبور إني أضللك ده مهما كان صاحبي بردو!!!
أبعدت مقعدها للخلف ونهضت بغضب:
_مش مجبور يا قائد، لاني مش هسألك تاني.
ناداها برفقٍ ومازال يجلس محله:
_مرين، ممكن تقعدي أنا لسه مخلصتش كلام معاكِ، عايز أعرف عملتي أيه مع الكلب ده؟!
