(أشباح المخابرات1) من الفصل الحادي عشر الى الخامس عشر
بقلم أية محمد رفعت
شدد على ساقه وقال بنبرة قوية:
_مش هتخلى عنك يا تيام، أنا جانبك ومش هسيبك، وبالعكس هحاول أساعدك تتخطى كل ده.
تهاوت دمعة من عينيه وقال وهو يغلقهما بتعب:
_مفيش حاجة هتخليني أتخطى العذاب ده يا عمر، ضيقوا عليا كلهم لحد ما رجعت ليهم من تاني بعد ما بعدت عنهم، مفيش مفر للاسف!!
واسترسل بإرهاق ودموعه مازالت تنهمر:
_أنا تعبان أوي بجد، تعبت من كل حاجة.
سانده “ياسين” بقوة جسده الرياضي، وخطا به لباب المطعم الصغير الجانبي، حتى ولج به لغرفة مكتبه، فتح الأريكة وجعلها فراشا مريحا، ثم وضعه من فوقها.
تمدد “تيام” وغلبه النعاس على الفور،بينما جلس “ياسين” يتأمله بنظرة غامضة، وهو يخطط للقادم وخاصة بعد ما فتح بابا جديدا لم يكن ليفتحه أبدًا لعدم تهاونه مع هؤلاء!!
*****
تناولت البيتزا بنهم، وتطلعت إليه بنظرة علم ما تود بها، فسحب زجاجة الكاتشب الخاصة به وألقاها لها هاتفًا بنزق:
_كل مرة تخلصي الكاتشب بتاعك وتدوري على اللي معايا مفيش فايدة!
وضعت على شطيرة البيتزا وتناولتها وهي تشير له:
_ما خلاص يا زين، سبني أكل بنفس بقى.
ضحك على مظهرها، وتناول ما بيده مرددًا:
_كلي ياختي، نكدتي على الواد وقاعدة ولا على بالك، مفترية ومحدش قادرلك!
وأضاف وهو يسحب المياه الغازية:
_صدقي بالله أنا مش صاحبه؟ بس نصحته 999مرة أنه يخلع بس للاسف هو اللي مصر وقابل بالجنان ده.
قالت وهي تلوك طعامها بهدوءٍ:
_أنا وهو مستحيل نكون مع بعض، حتى لو اتجوزنا هييجي الوقت وهنفترق، وده هيأثر على علاقتك بيه وعلاقة أنكل عدي وبابي وعمي، من الأخر العيلتين هيحصل بينهم حساسية تعامل، فـ ليه يحصل كل ده من الأول؟
انتقل وجعها إليه فمازحها بلطف:
_هو إنت كبرت الموضوع كده ليه يا مروان، طيب تصدق بالله الجارحي ده مفيش أطيب من قلبه، ده نفسه في الأكل أحسن من المطعم الفخم اللي بنأكل فيه ده.
واستطرد وهو يضحك بشدة:
_بس عندك حق إحنا بنق/تل في بعض في أقل نقاش في عيلتنا، والتثبيت بالاسلحة زي سلام عليكم كده.
ضحكت وهي تؤكد له، بينما يتابع:
_عيلة جوزك المستقبلي الإحترام هناك نمبر وان، لدرجة إن الصغير بيحترم الكبير بدرجة تخنق، إحنا عندنا البقاء للاقوى مش للأكبر نهائي، وعندك ابليس توابيت ومراد عصير أقوى مثل لكلامي ده.
ألقت منديلها الورقي وهي تشير له بتحذير:
_متتريقش على بابي وأنكل عشان هتضايق منك يا زين.
