(أشباح المخابرات1) من الفصل الحادي عشر الى الخامس عشر

ضيق عينيه بهدوء مرعب:
_فعلًا؟

هز “نوح” رأسه بتأكيد، فارتسمت بسمة هادئة على وجه “كِنان”، وهمس بسخط:
_كل اللي قولته ده مهزش شعرة فيا باستثناء زعيم المافيا اللي قولتها في الآخر دي، لإني فعلًا ظهوري بيخطف الاضواء.

قالها بغمزة ماكرة، فابتسم” نوح” وردد بحماس:
_يعني هتساعد أخوك حبيبك؟

تنهد بضجرٍ، انتقل لنبرته بينما يغدو صوب خزانته:
_أنا دايمًا بساعدك إيه الجديد يعني.

سحب منشفة كبيرة ومضى للخارج، فاتبعه “نوح” وقال بسعادة:
_يعيش كيوي يعيش يعيش بعيش.

استدار يقابله بنظرة حادة، فتوقف “نوح” وهو يبتلع ريقه بتوتر، وأسرع يجذب انتباهه:
_خلاص همشي إيدك على فلوس بقى، أخوك مُفلس من بعد الشوبنج اللي عملته لتالا الواطية اللي رمت الحاجة في وشي بعد اللف ده كله.

وأشار بإصبعه له:
_أنا عارف إني تقلت عليك بمصاريفي بس متقلقش كل مليم خدته منك هردهولك من أول عملية قلب أعملها لرجل اعمال متريش كده ويكون مش لاقين حد ينقذه، فيجيبوا العبد الله وساعتها هظرفهم مبلغ كبير حلاوة الشغلانه.

قالها وهو يضحك من قلبه، بينما لم تهتز ملامح “كِنان”، الذي رنا إليه يجذبه من رقبته إليه، وبضيق قال:
_إيه الهبل اللي بتقوله ده، فلوس إيه اللي تردهالي، أنا ثروتي كلها تحت رجليك، وبعدين أنا بشتغل وبعمل ده عشان مين؟؟

قالها وهو يجذبه لأحضانه، بينما يخبره بحزن:
_فداك مال الدنيا كله يا نوح، المهم تكون بخير.

واستكمل وهو يبعده عنه:
_ده أنا عامل الخزنة بشفرة إيدك عشان وقت ما تحتاج لفلوس مترجعليش وتأخد اللي يكفيك وبزيادة، وفي الآخر جاي تغلس عليا!

ارتسمت بسمة واسعة على وجهه، وقال وهو يزيح دموعا ارتسمت تأثرًا بحديثه:
_عارف يا كيوي، بس بحب أسمع لكلامك الحلو ده، حضنك بيعوض الجفاف العاطفي اللي عايش فيه، منه لله تيام مضيق خلقي وهو بره وجوه القصر إلهي ربنا يقل راحته البعيد.

اتسعت ضحكة” كِنان” و فاه:
_كفايا دعى الواد فيه اللي مكفيه.

وما كاد أن يجيبه حتى تفاجأ كلاهما ب”رزان” تخرج من حمام الجناح بفستانها الأسود الطويل، والمنشفة تحيط خصلاتها بينما تمضي للسراحة تبحث عن الجهاز لتجفف به خصلاتها المبتلة دون أن تنتبه لوجود “نوح”، الذي توسعت مُقلتيه واستدار تجاه أخيه الذي اصطنع أنه يحك أنفه بينما يكاد يسقط من الضحك على مظهر أخيه المضحك.