(أشباح المخابرات1) من الفصل الحادي عشر الى الخامس عشر
بقلم أية محمد رفعت
قالتها ومالت تبكي على الفراش، فأسرع إليها يربت على ظهرها بحنان ويدعمها:
_مش هيحصل أي حاجة من الكلام ده إنتِ ممتازة يا تالا وعلى طول بتقفلي المواد.
وأضاف ليمازحها:
_أنا اللي قلقان على نفسي، كنتِ زمان بتغششيني ولما اتفرقنا عاقبتيني وبطلتي تغششيني مهما ناديت عليكِ، اتمنى بعد ما بقيت جوزك أقدر استفاد من العلاقة دي في باقي الامتحانات، جوزك نفسه يتخرج قبل ما أخوه يشنقه على باب القصر.
ضحكت رغمًا عنها، ورددت وهي تزيح دموعها:
_شكلي أنا اللي هحتاج مساعدتك، أنا فعلًا مش في المود خالص بسبب اللي حصل امبارح، وزعل تيام مني في كفة لوحده.
أحاط وجهها بكفيه بحنان:
_هنتخطى كل ده يا تالا، وبعدين ما أنا قولتلك كِنان قال هيتصرف معاه، خلينا بس نركز في الامتحان دلوقتي، ماشي يا دكتورة؟
هزت رأسها بخفة وبينما يتطلع كلاهما للاخر، دفعته وهي تصرخ:
_الامتحــــــــــان!!
انتفض يجذب مفاتيح سيارته، ويهرول صوب باب الغرفة فعاد يغلقه وهو يصيح بانفعال:
_طرحتك يا بنتي؟!!
جحظت عينيها وهي تتحسس حجابها، وبغضب هتفت:
_إنت مش مكسوف من نفسك وانت بتبص على شعري من ساعتها وأنا مش بالحجاب.
لوى شفتيه بتهكمٍ:
_ما أنتِ كنتِ من شوية خارجة تواجهي العالم كله من غيره جت لحد عندي أنا يعني ووقفت!!
عقدت حجابها بسرعةٍ وهي تشيعه بنظرة نارية، فرنا صوبها يعدل من طرفه على كتفها وهو يبتسم بعشق:
_كده أحلى، طول عمرك زي القمر يا تالا!
أخفضت عينيها عنه بابتسامة هادئة، وسرعان ما تلاشت حينما صرخ من غفوته:
_الامتحــــــــــان!!
ركضت خلفه ثم توقفت وهي تصيح:
_فين الاقلام والادوات هنروح كده؟
قفز تجاه غرفة المكتب الصغيرة الخاصة به، وعاد لها يقدم لها ما سيحتاجونه، وقذفها بالبلطو الطبي قائلًا:
_ده زيادة عندي، زي ما يكون قلبي حاسس!
ابتسمت برقة ورددت وهي تتفحص الادوات:
_شكرًا يا نوح.
وقف قبالتها يهمس بحب:
_اتنين نوح من دي ومش هنحتاج لشهادة تخرج، وبعدين إنتِ عايزة أيه اكتر من شهادتي وأنا بشهد انك أعظم دكتورة بالدنيا كلها.
تلون وجنتها بحمرة الخجل، فاذا به يصرخ مجددًا:
_الامتحـــــــــــان!!!
وجذب معصمها يهرول صوب الدرج ركضًا، حتى وصل لسيارته، بينما يتابعهما كِنان من الاعلى، وبابتسامة ساخرة ردد:
_عصافير الكناريا بدأوا يجمعوا العش!
