(أشباح المخابرات1) من الفصل الحادي عشر الى الخامس عشر
بقلم أية محمد رفعت
ضحك “كنان” بصوت مسموع، وقال ليثير استفزازه:
_واضحلي احترامك يا حبيب أخوك مش محتاج تجهد نفسك في الاثباتات.
وتمتم بسخرية:
_كل ما برمي الكرة في ملعبك بترميها في ملعب تيام، وبتفتخر إنك دكتور، إنت دكتور غبي وفاشل من قبل ما تتعين.
لاح الحزن الطفولي على وجه “نوح”، فراح يضم أخاه ويصطنع البكاء على صدره:
_قلبك قسي عليا يا كيوي، وبعدين انا مش غبي أنا بس كان ورايا امتحانات وبذاكر عشان تفتخر بيا.
ضحك مجددًا وربت على ظهره بسخرية:
_أيوه في حاجات تانية بردو هحتاج أفتخر بيك فيها، الحاجات دي بردو مهمة.
على صوت بكائه مجددًا وهو يصيح:
_أنا عايز أتجوز تالا يا كيوي، اتصرف واتكلم مع تيام.
توالت ضحكاته وهو يخبره:
_مهي مراتك فعلًا، أعملك إيه عشان تقتنع!
ردد وهو يتصنع البكاء بصوت مضحك:
_مش عارف! دي بعد ما غششتها الامتحان قفلت الباب في وشي ورميتلي الهدايا وكل حاجة في وشي.
ورفع رأسه إليه يزيد من استفزازه:
_تيام شحنها عليا.
ابتعد” كِنان” عنه وولج للداخل يتمتم بسخرية:
_وإنت جاي تشحني عليه!
أكد عليه بجدية أضحكت الاخير:
_آيوه ما أنا معنديش حل تاني!
سحب سيجارًا من بنطاله، أشعله ببطءٍ وهتف:
_روح على جامعتك يا نوح، وركز في امتحاناتك، تيام مش هيسيبهالك بسهولة، وخاصة بعد ما ضيعت فرصتك بغبائك.
احتقنت عينيه بغضب انتقل لنبرته:
_يعني أنا علاقتي بيها مرهونة بإني أغلط معاها؟؟، ثم انك بنفسك اللي قولتلي ألطف الاجواء بعد اللي نيله هارون الله يجحمه مكان ما يكون.
سحب نفسًا من سيجاره والتفت يتمتم بسخط:
_تغلط معاها!! مش بقولك غبي ومبتفهمش، دي مراتك يا حيوان.
ربع يديه أمام صدره بعصبية:
_ماليش فيه اتصرف مع تيام وشوفلي معاه حل.
زوى حاجبيه بسخرية، وقال:
_وسيادتك متشفش الحل ده معاه ليه؟
بجدية مضحكة قال:
_عشان بخاف منه!
وأضاف وهو يشير على جسده:
_لكن إنت لك كلمه مسموعه عنده وعند الخلق كلها، طلتك اساسًا فيها هيبة وكبرياء كده، يابني انت لولا وجودك مع هارون القذر والديزل الغامض ده كان زمانك في حتة عاشرة، استايلك وشخصيتك تليق تكون بيهم عقيد في الجيش مثلا، رجل أعمال من اللي ليهم دخلة ملوكي كده، أو مثلًا مثلًا زعيم مافيا من اللي بيخشوا يسحبوا لقطة الكاميرا في آخر كام دقيقة كده.
واستكمل عسى أن ينال استحسانه:
_كيوي إنت للاسف مش عارف قيمة نفسك!
