(أشباح المخابرات1) من الفصل الحادي عشر الى الخامس عشر
بقلم أية محمد رفعت
تبدلت نبرة “كِنان” من المزح للجدية التامة:
_لا يا نوح، أوعى تستفز تيام خصوصًا بالفترة دي.
لاح التعب على ملامحه، وتساءل بحيرة:
_طيب أعمل إيه؟
أجابه وهو يربت على كتفه:
_متقلقش أنا هتكلم معاه بالوقت المناسب وأشوف دنيته إيه؟ المهم ركز في دراستك، وقبل ما تنزل خد من مكتبي الفلوس اللي محتاجها وأنا لما أنزل هخلي حيدر يحولك مبلغ كبير خليه على حسابك لوقت اللزوم.
ارتسمت ابتسامة واسعة على وجهه،ومال يضمه بحب:
_ربنا ما يحرمني منك يا كيوي.
رغم انزعاجه من دلاله الذي يمقته،إلا أنه ضمه وهمس له:
_ولا منك.
وأضاف وهو يبعده عنه بمشاكسة:
_يلا على جامعتك، وياريت بعد كده متقتحمش جناحي بالشكل ده، خلاص بقى ليا زوجة تشاركك فيا.
عاد الضيق يحتل قسماته، فإذا به يهدر بسخط:
_آه واخد بالي أنا، تصدق بالله إنت رشقتني عين وعديت إنت منها، يلا ما أنا سبق وقولتلك حظي متعوس هو!
وتركه يضحك على ما تفوه به ثم هبط الدرج للاسفل، فخطا “كِنان” للدرابزين يتابعه بحب، فاذا به يتوقف بالاسفل حينما توقف المصعد وخرجت “تالا” منه، اتسعت ابتسامة جذابة على وجه “نوح”، فألقى بحديث أخيه عرض الحائط وهرول صوبها:
_صباح الياسمين على أجمل دكتورة فيكِ يا إيطاليا.
مشطت القصر بنظرة مرتعبة وهي تنبهه:
_نوح!! إنت مش هتجبها لبر، مش قولتلك بلاش تكلمني طول ما تيام هنا!!
زفر بضيق وفاه بعدم مبالاة:
_ليه ان شاء الله، سيادته مش مقتنع إنك مراتي ولا إيه؟
عدلت من طرف حجابها بارتباك:
_لا بس آ…
قاطعها” نوح” بحدة وصوتٍ مرتفعٍ وصل ل”كِنان” بالاعلى:
_طيب بصي بقى يا تالا، بالصلاة على النبي كده عشان نكون على نور، لو متقبلتيش علاقتنا واتعاملتي معايا بطبيعتك ولبستي دبلتك واللبس اللي انا جبتهولك والأهم إن اللي حصل امبارح ده ميتكررش تاني يبقى مفيش ولا سؤال واحد هيخرج مني ليكِ، خليكِ وفية لأخوكي ولما تعيدي السنة إبقي اقعدي في أحضانه.
توسعت مُقلتيها بصدمة، ورددت بتوتر:
_بتستغل إني مكنتش بذاكر في الفترة اللي فاتت بسبب اللي حصل معانا يا نوح!
هز رأسه بتأكيد:
_أيوه أنا بني آدم استغلالي عادي جدًا.
وتابع بمكر:
_زي ما انتي بردو بتستغليني في اللجنه ولما بنخرج بتعملي نفسك متعرفنيش، وميزة إني بعرف أذاكر تحت أي ضغط وبقدر ألم المنهج كله في كام يوم تجبرك إنك تقبلي باللي بقوله وتقولي آمين.
