(أشباح المخابرات2) من الفصل الحادي والعشرون الى الخامس والعشرون

وجد درجا معدنيا أمامه، سلكه وهو يحاول استكشاف المكان الذي مازال غامضًا له.
*****
عاد “زين” إلى المنزل السري بعد أن تأكد أنه غير مُراقب، ولج يتحسس هذا الهدوء الخطير، فجلس على أحد مقاعد الرخامة وهو يهمس بنزقٍ:
_شكلهم خلصوا على بعض وهشتغل لوحدي في صمت ومزاج عالي.

أتته من خلفه تجيبه بنزق:
_على أساس إنك هتنجح لوحدك يعني!

تنهد بقلة حيلة، فجذب زجاجة المياه يرتشفها وهو يتمتم:
_ومش هنجح ليه طالما غورتي بعيد عني يا بومة.

اعتلت “مرين” المقعد المجاور له، وراقبته بنظرة ظهر فيها الغضب، قرأها “زين” وقال:
_ارمي قنبلتك، إنتِ من حبك في أبويا ماشية بالقنابل والخناجر والتوابيت، هنياله الجارحي، حظه وردي طول عمره.

فجرت ما تحمله بجعبتها:
_القائد بيعمل شغل شمال من ورانا.

سند على ذراعه وهو يتمتم بصوتٍ غير مفهوم:
_آه من خبث حوا، مخرجتش آدم من الجنة بس لا دي سلسال ممدود وعاشقة للفراق حتى عن صاحب عمري!

تساءلت “مرين” بدهشةٍ:
_بتقول إيه؟

صاح وهو ينزع جاكيته بنفور:
_بكلم نفسي، اتجنيت بعيد عنك، وبعيد عنك ليه ما أنتِ مجنونة من يوم يومك، المهم عمل إيه الجارحي؟

تغاضت عما يقول، وصاحت بضيق:
_قالي إنه رايح شقته ومرحش هناك، شكله بيتسرمح مع أنثى القنفذ بتاعته.

توسعت عينا “زين” بذهولٍ، ونهض عن محله والقلق يستحوذ عليه:
_ياسين دخل اللعبة رسمي قصاد عثمان، مش بعيد يكون آ…

قاطعته وهي تستند بذراعيها على الرخامة ببرود:
_لا متخافش، مش اللي في دماغك، سيادته واخد إشارة سرية من عُقاب، وبعدها اختفى.

عاد يحتل مقعده وهو يصيح بانفعال:
_خضتيني إلهي تتخضي على شعرك وهو مرمي جنبك يا بعيدة، إياكش قرعتك تهد غرورك الكداب ده.

واستكمل وهو يطالعها بغيظ:
_مالك ومال الواد، مش كفايا اللي عملاه فيه، أنا إلى الآن بحاول أهديه عنك، وشكله مش راجع عنك إلا بعقد جواز رسمي زيي أنا وحتة الكوكيز بتاعتي.

مالت تجاهه وقالت بدلال وهي تهز خصلاتها بيدها:
_بعينه وبعينك إنت كمان.

رمقها بسخطٍ وهدر:
_بعيني وقلبي وكل ما أملك فدى الكوكيزاية، لكن إنتِ مبتكتفيش بكده، مبترتحيش إلا لما الواد يرجع كل مهمة متصاب بسببك يا بايرة.

وعاد يغمز لها متعمدًا أن يغيظها:
_عايز أقبض على أختك بتهمة النصب، ساكنة قلبي من غير ما تدفعلي الإيجار!