(أشباح المخابرات2) من الفصل الحادي والعشرون الى الخامس والعشرون
بقلم أية محمد رفعت
ثم تابع همسه الساخر وهو يقف قبالتها، مُستندًا على ما خلفه:
_مع إنك مشفتيش مني اللي يخليني مُنحل في نظرك!
ارتبكت “قدس” قبالته، ودقات قلبها التي تعالت فجأة جعلتها تدعس فوقها بحذائها:
_أنا مبخفش غير من اللي خلقني، قولتلك أنا المشرط ده جزء من شغلي، بس بردو بعرف أستخدمه كويس مع اللي يفكر بس يقربلي، فما بالك بشخص زيك.
حافظ على تعابيره، وقال:
_تقصدي عشان قعيد!
وتابع وهو يتأملها بنظرة تسلية:
_ما بلاش تستفزي وحش القلعة بدل ما يهدها فوق دماغ الجميلة اللي هتعيش فيها!
دونت شيئًا بالنوت الطبي الذي تحمله، وهتفت بحزمٍ:
_كفايا تمارين كده النهاردة، كتبتلك على نوعية أدوية جديدة غير اللي إنت ماشي عليها، هسبها تحت مع مسؤولة الخدم، عن إذنك.
أمسك يدها بقوةٍ تعجبت منها “قدس”، ثم قربها وهو يقول:
_والهروب ده من شيم الشخصية القوية اللي جواكِ.
برقت فيه بغضب وبصوتٍ ثابت قالت:
_إيدك إبعدها حالًا عني وإلا هقطعهالك.
توالت ضحكاته، وقد أبعد كفه عنها ورفعه للاعلى باستسلام وهو يردد بانتشاء:
_أنا بعدتها عشان متفهمنيش صح، مش عشان خايف من تهديداتك يا دكتورة!
شيعته بنظرة قاتلة، قبل أن تلتقط حقيبتها وتخرج من جناحه، فما أن خرجت حتى وصل لمقعده بخطوات بطيئة مُجهدة، وما أن جلس من فوقه حتى أطلق صفيرًا آخر والابتسامة تحتل وجهه، ومن ثم حرر زرا من مقعده حتى استمع لصوت أحد من رجاله، فقال ومازال يميل برأسه للخلف:
_عايز أشوف غزل، النهاردة قبل بكره.
وعاد يكرر، وهو يميل للخلف:
_واتواصى بواجب ضيافة هارون، وهونوا عليه خضته مش سهلة، ده واحد لاقى رجالته بتقيده وبتحبسه زي الفار في الجحر.
وما أن اغلق هاتفه حتى مال يهمس بملامح شيطانية:
_الغبي فاكر أنه يقدر يبني إمبراطورية، على عرش شيطاني!!
******
تعجبت” مارال” مما استمعت اليه، وهبط الصمت من فوقها كالسهم النافذ، ولم تفق إلا على جملة “رحمة” الأخيرة:
_طبعًا كلامها ده كله كدب،أنا متكلمة مع البنت العربية جوه، أنا مش هسكت يا مارال، لازم أعرف إيه اللي بيحصل بالظبط، وإيه اللي جوه الأوضة المقفولة اللي خرج منها الدكتور ده.
تحررت عن صمتها حينما قالت:
_من فترة كنت بتابع حالة بنت حامل رجليها كانت مكسورة، البنت حكيتلي إنها مالهاش حد، ويدوب سبتها بليل ومريت عليها الصبح ملقتهاش، والغريبة إن الممرضة قالتلي أهلها أخدوها!!
