(أشباح المخابرات2) من الفصل الحادي والعشرون الى الخامس والعشرون

هز “زين” رأسه، وقال:
_كِنان كلمني وبلغني أكون عنده من بدري، بيقول في عملية مهمة جدًا هيقوموا بيها هما التلاتة.

رد عليه وهو يخمن عن طبيعة تلك المهمة:
_كويس إنه ابتدى يثق فيك وهيدخلك معاه في عمق أكبر من اللي قبله، بس خد بالك الكلاب دول ملهمش أمان، وبالأخص عثمان القذر.

على ذكره ابتسم “زين” وفاه بفخر:
_زمانه هيموت من القلم اللي ختمته بيه مرين، قدس قالتلي إنها أول مرة تشوفه بالغضب ده، أنا حقيقي فخور ببنتي الغالية،المرة الجاية تهورها هيطول هارون وعثمان الكلب.

سدد له “ياسين” نظرة غاضبة، جعلت الآخر يسحب ملعقة ويتناول الحساء وهو يشير له:
_روق بقى يا جارحي، البت الحمد لله تجاوزت مرحلة الخطر وهتبقى زي الفل، هنفضل نبكت وننكد على نفسنا ليه ما نفرح بالإنجاز اللي علم على قفا “عثمان التميمي”، واللي مش هيكون الأخير قول إن شاء الله.

صرخ فيه بعصبية بالغة:
_الأخير منها هي، لكن احنا الجايات كلها لصفنا، وياريت تعقلها وتقنعها باللي بقوله، وإلا أقسم بالله لأبعدك إنت وهي عن المهمة دي ساامع يا زين!!

ترك الملعقة بالطبق ورفع يده على قلبه بدراما مضحكة:
_بتتخلى عني يا جارحي!! هان عليك يطلع على لسانك كلام زي السم كده، هانت عليك العشرة والعيال وقسيمة الجواز اللي ما بينا، أخص عليك ده حتى دم الشهود على أم دي جوازة لسه مبردش بس أنا مش هزعل منك عارف ليه؟

زوى حاجبيه بسخرية، فسحب” زين” الملعقة واستكمل طعامه بخبث:
_عشان البايرة قايمة بواجبها معاك، هيبقى أنا وهي عليك، لا أنا قلبي رهيف وطيب يا جارحي.

واستطرد بينما يشير له بغرور على ذاته:
_ده غير إني مش محتاج أتغر وأنا بحكيلك عن بطولاتي، وإنك للأسف من غيري متقدرش تنجح بأي مهمة، لإن كل واحد مننا بيكمل التاني، اللي متعرفش تعمله أنا فنان فيه، وإنت كذلك، فمن الآخر من غير الحلة والغطا الطبخة مش هتستوي.

تنهد بضجر وهو يتمتم:
_يادي المطبخ اللي مبتخرجش منه.

وصاح بصدمة وهو يتأمل الطبق الذي أصبح فارغًا:
_إنت أكلت أكل أختك!

خطف نظرة للطبق، ثم رد عليه بضيق:
_ما إنت اللي نفسك جاحد في أي حاجة، حتى أكل العيانين يا مفتري، إنت مكانك في المطبخ مش الجهاز اسمع مني ومتراجعش ورايا.

سحب “ياسين” صينية الطعام الفارغة، وصوبها فوق رأسه وهو يتمتم بعصبية:
_هلاقيها منك ولا منها ولا من مين بالظبط!!!!!!