(أشباح المخابرات2) من الفصل الحادي والعشرون الى الخامس والعشرون
بقلم أية محمد رفعت
انبلجت بسمة ساخرة على شفتيه:
_إنت غلبان أوي يا تيام، عثمان مفيش ريشة بتحوم في مملكته الا وعارف واقعه منين وهترسى فين!
ونصب عوده الفارع، ثم مضي يشد على كتفه بقوة:
_خلينا نتحرك أحسن.
مضى خلفه، ثم أوقفه وهو يتساءل بارتباك:
_هي رزان مش بتشوف رحيق خالص؟
توترت ملامح “كِنان”،ولكنه تمكن من استعادة صلابة ملامحه أمامه:
_لا بتشوفها وبتقعد معاها على طول، بتسأل ليه؟
انتقل التوتر إلى” تيام”، ففاه وهو يتصنع عدم اللامبالة:
_لأ مستغرب بس إنها بطلت تحاول تتكلم معايا، أو تطلعلي أوضتي، شكيت إن الكلب ده بقى عنده نخوة.
شدد من جذبه تجاه باب الخروج وهو يتعمد تشتيت انتباهه:
_طيب بينا بدل ما نستدرج غضب عثمان بالتأخير!
هز رأسه بنفورٍ، ولحق به للأعلى بصمتٍ تام.
******
خرج ياسين من حمام غرفته، ثم وقف يرتدي ملابسه، فالتقطت أذنيه انغلاق الباب السري للمنزل، خرج مُسرعًا وهو يرتدي التيشرت الخاص به بطريقه، فاذا به يلمح مرين تصعد على الدراجة النارية وترتدي الخوذة الخاصة بها.
أسرع يوقفها وهو يتساءل:
_على فين بالوقت المتأخر ده عنيدة هانم؟
رفعت زجاج الخوذة وهي تحدجه بنظرة غائمة:
_سيادتك حططني تحت المراقبة وأنا مش واخدة بالي!
أجابها وهو يعدل خصلاته المبلولة:
_مش بالظبط، بس أعرف رايحة فين؟
نفخت بغضب شديد، وحاولت قدر الامكان أن تحافظ على هدوء لم يكن موجود لديها:
_ياسين إنت بتلكك عشان نتخانق تاني، وأنا مش متحملة كلمة زيادة، سبني أمشي، لازم أبات في الشقة المعروف مكانها لعثمان ولهارون، عشان زي ما سيادتك عارف الدوبلير اللي مكاني مش هتصمد كتير هناك.
صدقت شكوكه حيال أمر ذهابها، فسحب مفتاح الدراجة وأشار لها:
_انزلي، مش هتروحي لمكان.
راقبت ما يفعله بغضب شديد، وهبطت تتبعه وهي تصيح بجنون:
_أنا عايزة أعرف إنت في أيه بالظبط، سيبك من جو التحدي بتاعك ده وفكك مني أنا شخصيًا، أنا مش فاهمه إنت مشكلتك معايا أيه بالظبط!
وقف محله واستدار يقابلها ويديه تتربعان فوق صدره العريض:
_معنديش أي مشاكل معاكِ آنتِ كشخص، مشكلتي الحقيقية هي دماغك العنيدة دي، ومش راجع عنك الا لما أكسرها وبإيدي.
منحته بسمة ساخرة ورددت:
_بتحلم متأخر أوي يا قائد، من رأيي تدخل تكمل حلمك على سريرك وتديني المفتاح.
