(أشباح المخابرات2) من الفصل الحادي والعشرون الى الخامس والعشرون
بقلم أية محمد رفعت
أبعدها “كِنان” عنه وهو يضم وجهها بين يديه بخوفٍ:
_لا يا رزان، أوعـــي تدخلي نفسك في الحرب اللي ما بين هارون وتيام أوعــــــــــي!!
واسترسل بهلعٍ وخوف عليها:
_لو عملتي كده هارون مش هيسمي عليكِ، عشان خاطري أوعي تعملي كده.
منحته بسمة ساخرة، ورددت بصوت خافت:
_هيعمل معايا إيه تاني وحش أكتر من اللي عمله فيا، ده شيطان مش بني آدم، أنا بقيت واثقة إنه مستحيل يكون أخويا.
حديثها كان غامضًا إليه، بالشكل الذي دفعه لسؤالها:
_عمل إيه هارون؟ إنتِ مخبية عني حاجة؟
توترت ملامحها، وتهربت من الإجابة بقولها الساخر:
_كل اللي أنا فيه ده وعملي إيه؟ ضربه وإهانته ليا واصراره إني أكسر نفسي قدامك عشان تقبل تتجوزني وبتسألني عمل إيه؟؟ إجباره ليك إنك تتجوزني غصب عنك وبتسألني!
شدد من ضمه لها وصاح بجدية تامة بينما يدقق النظر في زرقتيها الحمراء:
_نهاية قصة الحب اللي ما بينا أكيد كانت هتكون الجواز يا رزان، إنتِ واثقة من حبي ليكِ، فإيه لازمته الكلام ده؟؟؟ معقول بتشككي في حبي ليكِ.
مالت على يديه ببكاء وهي تهز رأسها بنفيٍ، بينما تزحف نحو أحضانه وهي تهمس بصوتٍ مبحوح:
_أنا تعبانه أوي يا كِنان، نفسي أمشي من المكان ده، خدني في أي حتة تانية، أنا بتخنق هنا.
شدد من ضمها وهو يقبل رأسها وخصلاتها، فإذا بها تطالبه بمشاكسة حزينة:
_بقولك مخنوقة، محتاجة هوا نقي، يمكن ينفعني في وضعي ده.
ارتسمت ابتسامة جذابة على وجهه، وردد بسخرية:
_إنتِ حججك بتكتر خدي بالك، ما تيجي دغري وتقوليلي ليتس جو يا سوبرماني، وهقولك بينا من غير وصلة النكد دي!
أحاطت رقبته وتعلقت فيه وهي تميل على ذراعه بإرهاق:
_let’s go.
ضحك من قلبه وهو يحل عنه قميصه، ثم ارتفع بها وهو ينبهها ساخطًا:
_لو ردار عثمان لقطني كل يوم والتاني وأنا واخدك أفسحك، هطلقك بالتلاتة ومن غير ولا قلم.
أغلقت عينيها باستمتاعٍ ورددت:
_متقدرش تستغني عني، ولا عشان عثمان ولا هارون ولا أي قوة على وجه الأرض.
زاد من ضمه لها وقال بصدق عاشق عاش على حبها:
_ولا حتى قوة من الجحيم يا روزيلا!
*****
وضع “ياسين” الحساء والعصير على الصينية، وما أن استدار حتى تفاجأ ب”زين” يقترب منه، ويجلس على المقعد المعتاد له قبالة الرخامة، يخبره عما أبلغه به “ليل العربي”، وعن زيارته ل” قدس” وما أخبرته به، وضع “ياسين” ما بيده على الرخامة وردد بحيرة:
_لو عثمان مركب طرف صناعي أعتقد قدس كانت عرفت بده من أول ما بدأت تمارين معاه، أكيد في حاجة تانية ورا الحوار ده.
