(أشباح المخابرات2) من الفصل الحادي والعشرون الى الخامس والعشرون
بقلم أية محمد رفعت
طالعها باهتمام، وتساءل:
_المعنى؟
هزت كتفيها بحيرة:
_معرفش، يمكن دراعه مش طبيعي، يمكن مركب طرف صناعي مثلًا!!
وضمت جبينها بإرهاقٍ، وهي تهتف:
_بس أنا وأنا بتعامل معاه مشكتش في حاجة زي دي خالص، الإنسان ده غامض بشكل معداش عليا، وخبثه كله في عقله مش في قوته، وده في حد ذاته نقطة لازم نركز فيها.
ورفعت بصرها نحوه تتساءل بفضول:
_وإنت كنت جاي تشوفني ليه؟
تنهد وهو يسحب نفسًا طويلًا، ليفصح لها عن تحذيره:
_تيام اخترع عقار مسؤول عن الإدراك البشري الكامل، والمفروض إنه حرق التقارير وكل اللي يخص العقار المرعب ده، بس طبعًا دي مش هتفوت عثمان، المختبر كله كان متراقب، وقدر إنه يصنعه ومحدش بيستخدمه غيره.
ضيقت بنيتيها باستفهام:
_إيه العقار ده؟
رد عليها دون أن يؤخر إجابته:
_عقار بيتحكم بالإنسان تحكم كلي، بيسيطر بيه على العقل، ويخليه يطيع كل أوامره، اق*تل فلان دمر كذه، حتى لو طلب إنه يق*تل نفسه هيعمل كده والعقل مُغيب تمامًا، ومستحيل يفتكر حاجة عملها بعد ما يفوق، وطول مهو بالحالة دي مبينطقش بحرف واحد.
وحرك كتفه بحزن شديد وهو يتابع:
_ويمكن ده تفسير منطقي لبعض الجرايم اللي بتحصل واللي بتخلي المتهمين في حالة صدمة تامة من اللي عملوه، لدرجة إنهم ممكن يفقدوا عقولهم!
جحظت عيناها في صدمة زادت حينما دقق النظر فيها وقال:
_وجودي هنا دلوقتي تنبيه ليكِ، القادة شاكين انه بيستخدم عليكِ نفس العقار يا قُدس.
رمشت بأهدابها الثقيلة بصعوبة، وراحت تتساءل بصدمة:
_عليا أنا!! طيب ليه؟؟
وردت على ذاتها قبل أن تترك له الفرصة:
_أنا فعلًا شكيت إن بيحصل معايا حاجات غريبة، في كل مرة بسترد فيها وعيي، بس اللي مش فاهماه ليه؟ لو هو شاكك فيا هيستخدم معايا اللي يخليني أتكلم وأقر بيه عن نفسي، مش عقار بالمواصفات دي!
هز رأسه مُؤيدًا لحديثها، وأكد عليه:
_دي حقيقة، عشان كده أنا عايزك تكوني واعية لكل حاجة بيعملها الكلب ده.
وسحب ظرفًا مطويا قدمه لها، وهو يخبرها بجدية:
_الدوا اللي بالظرف ده خدي منه حباية واحدة أول ما تشكي فيه، هيساعدك بعد كده تستردي اللي حصل، حتى لو مش كله بس على الاقل هتكتشفي الكلب ده بيفكر في إيه تجاهك!
واستطرد وهو ينبهها مجددًا:
_طبعًا مش محتاج أقولك كل ما أشوفك، إنك لو حسيتي بأي خطر انسحبي بشكل مباشر، وأنا وياسين هنتعامل.
